Այսօր հրավիրած մամուլի ասուլիսի ժամանակ հակակոռուպցիոն Transparency International կենտրոնի խորհրդի անդամ Սոնա Այվազյանը, «Սպառողների իրավունքների պաշտպանություն» հասարակական կազմակերպության նախագահ Աբգար Եղոյանը, «Ինտերնյուս» հասարակական կազմակերպության փաստաբան Մովսես Հակոբյանը ներկայացրեցին հարյուր ՀԿ-ների բողոքն ընդդեմ «Հասարակական կազմակերպությունների մասին » ՀՀ օրենքում կառավարության կողմից սեպտեմբերի 23-ին ընդունած  փոփոխությունների:

ArmAr.am-ի այն հարցին, թե նոր օրինագիծը պայմանավորված չէ՞, արդյոք, հայ-թուրքական հարաբերությունների շուրջ սկիզբ առած քննարկումներով և այն վտանգով, որ մեզանում կարող են հայտնվել  ՀԿ-ներ, որոնք կարող են   ֆինանսավորվել, ասենք, Թուրքիայի կողմից, Սոնա Այվազյանն այսպիսի պատասխան տվեց.

«Երբ թուրքը կարող է մասնաբաժին ունենալ նոր կառուցվող ատոմակայանում, ապա ՀԿ–ի ֆինանսավորումը թուրքական կողմից այնքան էլ վտանգավոր չի կարող լինել: Եթե տվյալ ՀԿ-ի նպատաները չեն հակասում ՀՀ Սահմանադրությանը, ապա չի բացառվում, որ այն կարող է ֆինանսավորվել նաև թուրքական կողմից: Պատահական չէր օրինագծի փոփոխությունը հայ-թուրքական արձանագրությունների բուռն քննարկման ընթացքում, քանի որ այս օրինագիծը աննշան մի բան էր այդ գործընթացի ֆոնին և հույս ունեին, թե անարձագանք կմնա, սակայն մենք ամեն ինչ կանենք, որպեսզի օրինագիծը հետ կանչվի Ազգային ժողովից»:

Որպես օրինագծի դեմ պայքարի վերջնակետ ՀԿ-ների ներկայացուցիչները հայտարարեցին, որ պատրաստ են անգամ միջազգային կառույցների միջնորդությամբ հասնել «Հասարակական կազմակերպությունների մասին » ՀՀ օրենքում կառավարության կողմից սեպտեմբերի 23-ին ընդունած  փոփոխությունների կասեցմանը:

ArmAr.am