Օրերս Մարտակերտի շրջանի Թբղլու գյուղի բնակիչների համար իրականություն դարձավ այն, ինչը  մինչև վերջերս անհավանական  էր թվում.  Խաչենի կենարար ջուրը նոր ջրագծով ինքնահոս հասավ Թբղլուի դաշտերը:

Նոր ջրագծի կառուցումը որքան երազելի, նույնքան էլ անսպասելի էր: Թբղլուի հողատարածքները գտնվում են Խաչեն գետի մակերևույթից մոտ 27 մ բարձրության վրա: 2008 թվականին ԼՂՀ վարչապետ Արա Հարությունյանը, այցելելով գյուղ և անձամբ համոզվելով, որ ոռոգման համակարգի բացակայությունը գյուղի զարգացման համար լուրջ խոչընդոտ է, խոստացավ` նոր ջրագիծ կառուցել: 2008-ի դեկտեմբերին մեկնարկեց Խաչեն-Թբղլու 6 կմ ջրագծի կառուցումը: «Խոստացավ ու կատարեց»,- ասում է  ամեն տեսակ խոստումներից թերահավատ Թբղլու համայքի ղեկավար Սանասար Հարությունյանը:

Գյուղի բնակիչներից Ազատ Բեգլարյանը 72 տարեկան է:  Նա, ինպես և իր բոլոր մեծ ու փոքր համագյուղացիները, ցնծություն էր ապրում: Խաչեցիների երազանքը կատարվել է` ջուրը հոսում է դեպի գյուղ:  Ջրագծի կառուցման համար պահանջվել է մոտ` 76 մլն:

Ջրագծի ջրընդունիչ հիդրոհանգույցը գտնվում է հարևան Վանք գյուղի հարավային մասում` Գառնաքարի կամրջի հարևանությամբ: 250 մմ տրամաչափով, 50 լիտր-վայրկան ջրողունակությամբ ջրագիծը, մասնագետների հավաստմամբ, կապահովի Թբղլուի բոլոր` 59 ընտանիքներին պատկանող 120-130 հա սեփականաշնորհած հողատարածքները: Ջրագծի նախագիծը կազմել է «Մոնոլիտ» ՓԲԸ-ն, շինարարությունն իրականացրել է «Սֆինքս» ընկերությունը: Մարտակերտի շրջվարչակազմի պատասխանատուներն ու մայրաքաղաքից ժամանած մասնագետները շինարարության որակի հարցում միակարծիք են.  «Ամեն ինչ կատարվել է նախածի համաձայն»,- ասում է ԼՂՀ ԿԱ ջրային տնտեսության վարչության պետ Սեյրան Միքայելյանը:

Իսկ Թբղլուի բնակիչ Ազատ Բեգլարյանը  գյուղ հասած ջուրը գյուղացիների եկամտի և գյուղի բարգավաճման նոր հնարավորություն է համարում. բարեբեր հողը կար, ջուրն էլ ունեցան:

Ջրային տնտեսության վարչության պետի խոսքերով` հանրապետությունում ոռոգման համակարգի բարելավմանն ու ընդլայնմամանն ուղղված աշխատանքները կշարունակվեն:

Նորայր ՀՈՎՍԵՓՅԱՆ
Ստեփանակերտ