Ֆրանսիայի Լիոն քաղաքում 2008 թ. տեղական ինքնավարության մարմինների ընտրությունների ընթացքում սոցիալիստների և կանաչների կողմից թեկնածու առաջադրված ազգությամբ թուրք Բասքն Օրանի դուստրը` Սըրմա Օրան Մարթսը, ասել է, որ սոցալիստների նախագահ Ժան Պոլ Բրետը իր հորից պահանջել է` կամ ընդունել Հայոց Ցեղասպանությունը, կամ էլ հանել թեկնածությունը: «Եվ հայրս ստիպված էր հրաժարվել ընտրապայքարից»,- ասել է Բասքն Օրանի դուստրը:

Ի դեպ, այդ մասին նա հայտարարել է Լիոնում սկսված դատավարության ընթացքում. տեղեկացնենք, որ Բասքն Օրանը Ժան Պոլ Բրետի դեմ հայց է ներկայացրել դատարան` վերջինիս մեղադրելով իր վրա ճնշում գործադրելու մեջ: Ինչպես տեղեկացնում է «Հյուրիեթ» թերթը, դատական որոշումը հրապարակվելու է 2010թ. հունվարի 5-ին:

Դեպքի շուրջ այսօր արդեն բուռն քննարկումներ են ընթանում: Եթե ֆրանսաբնակների մի մասն այն կարծիքին է, որ ցանկացած մարդ կարող է իր տեսակետն ունենալ և պետք չէ նրան այլ կարծիք պարտադրել, և խնդիրը դիտում են   խոսքի ազատության տեսանկյունից, ապա ոչ պակաս մեծ թիվ են կազմում այն ֆրանսիացիները, ովքեր հայտարարում են, որ    «Հայոց Ցեղասպանությունը կատարված փաստ է, և ոչ ոք իրավունք չունի այն  կասկածի տակ դնելու»: Թե դատական գործընթացն ինչ ավարտ կունենա, այսօր դեռ դժվար է ասել:  Սակայն նկատենք, որ, ի տարբերություն Շվեյցարիայի,  Ֆրանսիայում չի գործում Հայոց Ցեղասպանության ժխտումը քրեորեն պատժող օրենքը:

ArmAr.am