Հակահայկական գովազդային պաստառներն ապամոնտաժվում են

Ի պատասխան Ձեր կողմից կատարված տեղեկատվական հարցման՝ «Գնիր Հայկականը» կարգախոսով  պաստառների պատվիրատուն «Հազարամյակների Մարտահրավերներ»  ծրագիրն է, որի կողմից Երևանի քաղաքապետարան է դիմել  «ԷԳԱ» սահմանափակ պատասխանատվության ընկերությունը:  Նույն ընկերությունն էլ  ներկայացրել է արտաքին  գովազդային վահանակների հաստատված ուրվանկարների (էսքիզների) օրինակները:

Մինչ արտաքին գովազդային նյութի տեղադրումը, ըստ կարգի, պատվիրատուն դիմում է տվյալ վարչական շրջանի աշխատակազմ, վճարում սահմանված տեղական տուրք և ստանում արտաքին գովազդի տեղադրման (տեղաբաշխման)  թույլտվություն: «Գնիր Հայկականը» պաստառներում տեղ գտած  կոպիտ խախտման համար քաղաքապետարանի աշխատակազմի արտաքին ձևավորման և գովազդի վարչության գլխավոր մասնագետին նկատողություն է տրվելու, իսկ վահանակներն այս պահին ապամոնտաժվում  են /վահանակների նախկին հասցեներն էին` Խանջյան փողոց, Հերացի փողոց, Բաղրամյանի պողոտա,  Կոմիտասի պողոտա, Գրիգոր Լուսավորիչ փողոց/:

Երևանի քաղաքապետարանի աշխատակազմը շնորհակալություն է  հայտնում լրագրողներին  ուշադրության համար և հույս է հայտնում, որ այս հարցով նրանք հետևողական կլինեն նաև պատվիրատուի՝ «Հազարամյակների Մարտահրավերներ» ծրագրի նկատմամբ։

Երևանի քաղաքապետարանի տեղեկատվության
ու հասարակայնության հետ կապերի վարչություն