Հ. Աբրահամյանը հանդիպել է Թուրքիայի խորհրդարանի նախագահի հետ
Նախօրեին տեղի ունեցավ ՀՀ ԱԺ նախագահ Հովիկ Աբրահամյանի հանդիպումը Թուրքիայի ազգային մեծ ժողովի նախագահ Մեհմեթ Ալի Շահինի հետ, որը ևս մասնակցում է ՍԾՏՀ ԽՎ մոսկովյան հանդիպմանը: Այս մասին հաղորդում է ՀՀ ԱԺ հասարակայնության հետ կապերի վարչությունը:
Հանդիպման ընթացքում զրուցակիցները միմյանց փոխադարձաբար ներկայացրեցին իրենց երկրների խորհրդարանների կառուցվածքի և գործունեության առանձնահատկությունները: Նրանք տեսակետներ փոխանակեցին առանց նախապայմանների երկկողմ հարաբերություններ հաստատելու գործընթացի շուրջ:
Հ. Աբրահամյանն ընդգծեց, որ հայկական կողմն անհրաժեշտ է համարում, որպեսզի ստորագրված հայ-թուրքական արձանագրությունները վավերացվեն ողջամիտ ժամկետներում:
Երկու խորհրդարանների ղեկավարները բարձր գնահատեցին ՀՀ և ԹՀ Նախագահների համարձակ համատեղ աշխատանքը և համաձայնեցին, որ դրա շնորհիվ պարարտ հող է ստեղծվել երկու հարևան ժողովուրդների միջև բնականոն հարաբերություններ հաստատելու համար: Այդ համատեքստում նրանք համաձայնեցին, որ անհրաժեշտ է առաջին հերթին խրախուսել մարդկային ուղղակի շփումները, ինչպես նաև փորձել կապեր ստեղծել ՀՀ ԱԺ և ԹԱՄԺ միջև:
Զրուցակիցները գոհունակությամբ ամփոփեցին հանդիպումը` հույս հայտնելով, որ կունենան նոր հանդիպումների առիթներ:
Դիտել Լրահոս բաժնի բոլոր նյութերը
