ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը նոյեմբերի 26-ին ընդունեց փաստահավաք առաքելությամբ տարածաշրջան ժամանած  Ֆրանսիայի  Հանրապետության Ազգային ժողովի պատգամավորներ, արտաքին հարաբերությունների հանձնաժողովի անդամներ Քրիստիաս Բատային և Ռոլանդ Բլյումին:    Հանդիպմանը ներկա էր Հայաստանի Հանրապետությունում Ֆրանսիայի դեսպանության առաջին խորհրդական Քրիստիան Բեքը:

Ողջունելով եվրոպացի գործընկերներին` տիկին Զոհրաբյանը բարձր գնահատեց հայ-ֆրանսիական քաղաքական, ինչպես նաև` զարգացող տնտեսական հարաբերությունները, ինչի վկայությունն է  նաև «Օրանժ» ընկերության մուտքը Հայաստան: Անդրադառնալով հայ-ֆրանսիական բազմակողմ հարաբերություններին` նա փաստեց հայ-ֆրանսիական պատգամավորական բարեկամության խմբերի արդյունավետ գործակցությունը, կարևորելով երկու երկրների միջև զարգացող համայնքային հարաբերությունները, ինչի վկայությունն է Հայաստանի և Ֆրանսիայի 20-ից ավելի քաղաքների սերտ գործակցությունը: Հանդիպման ընթացքում քննարկվեցին տարածաշրջանային նշանակության հարցեր:

Անդրադարձ եղավ հայ-թուրքական հարաբերությունների  կարգավորմանը, ԼՂ հակամարտության լուծման խնդրին, այդ հարցում  ԵԱՀԿ Մինսկի խմբի շրջանակներում Ֆրանսիայի ներդրած ջանքերին: Տիկին Զոհրաբյանն անդրադարձավ  արցախյան հակամարտության կարգավորման վերաբերյալ օրերս Ադրբեջանի նախագահ Իլհամ Ալիևի և պաշտպանության նախարար Սաֆար Աբիևի  հնչեցրած  հայտարարություններին, մեկ անգամ ևս կրկնելով, որ Հայաստանը հակամարտության կարգավորումը տեսնում է ԵԱՀԿ Մինսկի խմբի շրջանակներում` խաղաղ, բանակցային ճանապարհով. «Մենք պատերազմ չենք ուզում, բայց մեզ պատերազմով հնարավոր չէ վախեցնել»,- շեշտեց հանձնաժողովի նախագահը:

Հանդիպման ընթացքում հայ և ֆրանսիացի գործընկերներն անդրադարձան ԵՄ «Արևելյան գործընկերություն» նախաձեռնությանը և դրա որոշ ծրագրերին միանալու  ՌԴ արտգործնախարարի հայտարարությանը, ինչը, ըստ Նաիրա Զոհրաբյանի, լավ հիմք է տարածաշրջանային համագործակցության համար:

Կողմերն անդրադարձան նաև 2008 թվականի նախագահական ընտրություններից հետո տեղի ունեցած իրադարձություններին, ԱԺ մարտիմեկյան դեպքերի ուսումնասիրման նպատակով ստեղծված հանձնաժողովի զեկույցին և դրանում ընդգրկված առաջարկների իրականացումն ուսումնասիրելու նպատակով կատարվող քայլերին:

 ՀՀ ԱԺ հասարակայնության  եւ տեղեկատվության միջոցների հետ կապերի վարչություն