Ադրբեջանի քաղաքական շրջանակներում շարունակում են քննարկվել հայ-թուրքական հարաբերությունները:  Այդ քննարկումներում  հիմնականում շեշտադրվում է այն միտքը, որ Արձանագրությունների վավերացումը նախ և առաջ վտանգավոր է Ադրբեջանի համար, քանզի  այն ոտնահարում է իրենց երկրի շահերը: Հետևապես, Ադրբեջանը պետք է ամեն ինչ անի, որպեսզի  Թուրքիան առհասարակ մերժի դրանց վավերացումը: Այսպես.  «Ֆրանսպրես» գործակալության փոխանցմամբ, Ադրբեջանի փոխարտգործնախարար Արազ Ազիմովը հայտարարել է, թե Ադրբեջանի արձագանքը շատ կոշտ կլինի, եթե Թուրքիան վավերացնի Հայաստանի հետ սահմանը բացելու և դիվանագիտական հարաբերություններ հաստատելու արձանագրությունները:  «Հայ–թուրքական մերձեցումը սպառնում է ոչ միայն Ադրբեջանի, այլև Եվրոպայի և Միցյալ Նահանգների շահերին։ Արևմուտքը պետք է հասկանա, որ չի կարելի առաջ մղել հայ–թուրքական հաշտեցումն առանց Ադրբեջանի կարծիքը հաշվի առնելու»,- հայտարարել է Ազիմովը։

Խնդրի առնչությամբ իր «ուրույն»  կարծիքն է հնչեցրել նաև Ռուսաստանի մահմեդական կոմիտեի նախագահ,  հակահայկական իր դիրքորոշմամբ հայտնի քաղաքագետ, ազգությամբ ադրբեջանցի Հեյդար Ջեմալը:  Վերջինիս կարծիքով, հայ–թուրքական արձանագրությունների ստորագրմամբ Ադրբեջանը հայտնվում է շրջապատման մեջ: Ըստ նրա, սա մի խաղ է, որում Ադրբեջանի դեմ են «խաղում» Հայաստանը, Իրանը, Ռուսաստանը, Ղարաբաղի հարցում «լպրծուն եսասիրական» մոտեցում որդեգրած Արևմուտքը,  ինչպես նաև Թուրքիան` իր «լղոզված» դիրքորոշմամբ: Ջեմալն Ադրբեջանի հասարակությանն  ահազանգում է. «Այս պայմաններում Ադրբեջանի ազգային անվտանգության մարտահրավերները, անկասկած, կտրուկ ավելանում են»:

Ադրբեջանական անհանգստություններին հավասարապես  արձագանքում են նաև Թուրքիայում. «APA» գործակալության փոխանցմամբ, Թուրքիայի խորհրդարանի արտաքին հարաբերությունների հանձնաժողովի նախագահ, «Արդարություն և զարգացում» կուսակցության անդամ Մեթին Յըլմազն ասել է, որ հայ–թուրքական արձանագրությունների քննարկումը կախված է Ադրբեջանից, և որ դրանք չեն քննարկվի հանձնաժողովում, եթե «Ադրբեջանն ինչ–որ բանից դժգոհ լինի»:

ArmAr.am