Գրեթե բոլոր վերլուծաբաններն ընդգծում են այն հանգամանքը, որ  Թուրքիայի վարչապետ Ռեջեփ Թայիփ Էրդողանը, ԱՄՆ կատարելիք պաշտոնայցի ընթացքում, նախագահ Բարաք Օբամային փոխանցելու է երեք կարևոր հաղորդագրություն, որոնք հիմնականում վերաբերում են իրանական խնդրին.

1. բոլոր երկրներեն էլ կարող են միջուկային տեխնոլոգիաներ ունենալ խաղաղ նպատակներով,
2. միջուկային զենքերը սպառնում են աշխարհի ու մեր տարածաշրջանի բնակչությանը,
   3. դիվանագիտության և երկխոսության համար ճանապարհ պետք է հարթել:

Թուրքիայի արտգործնախարար Ահմեդ Դավութօղլուն ևս, խոսելով Էրդողանի` ԱՄՆ կատարելիք այցի մասին, ակնարկել է, որ դա կապված է Իրանի միջուկային ծրագրերի հետ:

Իսկ մինչ ԱՄՆ կատարվելիք այցը, Թուրքիայում բարձրաստիճան մակարդակով անվերջ հայտարարություններ են հնչում, որոնցում շեշտվում է այն միտքը, որ եթե Միացյալ Նահանգները Թուրքիայի ռազմավարական դաշնակիցն է, ապա Իրանը`  շատ մոտ հարևանը:

Դավութօղլու փոխանցմամբ, իրանական խնդրով ինքը հեռախոսազրույցներ է ունեցել նաև Գերմանիայի, Մեծ Բրիտանիայի, Ռուսաստանի և ԱՄՆ-ի արտաքին գերատեսչությունների ղեկավարների հետ` նրանց ներկայացնելով   վերջերս Իրանում ունեցած իր բանակցությունների բովանդակությունը:

Այսպիսով, Թուրքիան հասկանում է, որ եթե այսօր «իրանական խնդրի» լուծման գործում ունենա իր  լուրջ դերակատարումը, ապա ակնհայտ է, որ դրանով  կբարձրանա իր վարկանիշը և Արևելքի, և Արևմուտքի աչքում: Դա վերջինիս համար շատ կարևոր հանգամանք է, քանի որ ակնհայտ է, որ Թուրքիան ճիգեր է գործադրում հանդես գալու որպես խաղաղարար պետություն` այս կերպ փորձելով արդարացնել մահմեդական և եվրոպական աշխարհների հետ միաժամանակ մերձենալու իր փորձերը:

Քրիստինե Մելքոնյան

ArmAr.am