Հակահայկականության ու հակաֆաշիզմի ուղղությամբ մասնագիտացած ադրբեջանցի քաղաքագետներից մեկը վերջին օրերին հանդես է եկել հայտարարությամբ, որում ասվում է, թե հնարավոր է Ադրբեջանը հարված հասցնի Հայաստանի տարածքում գտնվող Մեծամորի ատոմակայանին, այն էլ այնպիսի հարված, «որ հայերը փառք տան Չեռնոբիլի դեպքերին»:

Նման խելացնոր հայտարարությանն իր հոդվածներից մեկում հակահարված է տվել վերլուծաբան Իվան Ռատցիգերը` նշելով, որ դեռ  կարճ ժամանակ առաջ հայտարարության հեղինակը քաղաքական կոռեկտության շրջանակներում «ֆաշիստ հայերին» սովորեցնում էր, որ «երկրի վրա  ապրող  բոլոր ժողովուրդները եղբայրներ են»:

Անդրադառնալով հայտարարությանը` Ռատցիգերը գրում է. «Անկանխատեսելի ու դժվար բացատրելի ամեն ինչի համար համապատասխան անվանում գտնելու ցանկություն է առաջանում: Բայց ինչպե՞ս անվանել մի ողջ տարածաշրջան ռադիացիայով վարակելու ադրբեջանական սպառնալիքը: Նման խենթության անունն ուղղակի «ատելություն» է»:

Վերլուծաբանին հատկապես հետաքրքրական է թվում այն հանգամանքը, որ Հայաստանի նկատմամբ «դաժան հաշվեհարդար տեսնելու» մարմաջի մեջ Ադրբեջանը պատրաստ է անգամ զոհաբերել «եղբայր» հորջորջվող Թուրքիային. «Թունավորման տարածքում կլինի նաև Թուրքիան, որին ադրբեջանցի քաղաքագետը, համենայն դեպս, մինչև վերջին ժամանակներս, «սիրելի եղբայր» էր համարում»,-գրում է Ռատցիգերը:

ArmAr.am

Թեգեր` Ադրբեջան, ատելություն, Իվան Ռատցիգեր, հակահայկականություն, հակաֆաշիզմ, Հայաստան, Մեծամորի ատոմակայան, Չեռնոբիլ