Այսօր ՀԱԿ-ի համակարգող Լևոն Զուրաբյանը «Հայացք» ակումբում հրավիրել էր մամուլի ասուլիս` մեկնաբանելու ՀԱԿ-ի երեկվա հայտարարությունը` կապված Աթենքում Լեռնային Ղարաբաղի խնդրի վերաբերյալ ԵԱՀԿ Նախարարների խորհրդի հայտարարության հետ:

Ըստ էության` խոսնակը ոչ թե մեկնաբանեց հայտարարությունը, այլ վերաշարադրեց այն` փորձելով վստահեցնել ներկաներին, որ ժամանակին Լևոն Տեր-Պետրոսյանի իշխանությանը հաջողվել էր գտնել դիվանագիտական մեխանիզմ, որով պետք է ապահովվեր Ղարաբաղյան խնդրի լուծումը` ինքնորոշման սկզբունքի հիման վրա: Դա, նրա խոսքերով, ԵԱՀԿ-ն էր: Բայց արի ու տես, որ, ըստ ՀԱԿ-ի ներկայացուցչի դիտարկման,  Տեր-Պետրոսյանի տարիների «տքնաջան»  դիվանագիտական «փայլուն» աշխատանքը ջուրն ընկավ դեկտեմբերի 2-ի որոշմամբ:

Ի դեպ, Զուրաբյանը նկատեց, թե Տեր-Պետրոսյանի վարչակազմի ողջ դիվանագիտական աշխատանքն ուղղված է եղել նրան, որ Ադրբեջանի տարածքային ամբողջականության սկզբունքը տեղ չգտնի միջազգային փաստաթղթերում:

Սակայն , եթե ՀԱԿ-ի ներկայացուցչը  կորցրել է սեփական հիշողությունը, կամ էլ թերևս  իր համար  շատ դժվար է ներկայացնել Տեր-Պետրոսյանի` ղարաբաղյան խնդրում ոչ հայանպաստ, մասամբ, նաև ադրբեջանամետ  քաղաքականությունը,  ապա գոնե պետք է տեղյակ լինի,որ լրագրողները  չեն տառապում հիշողության կորստով:

Եվ այսպես, այն  հարցին, թե ինչպես կարող է մեկնաբանել Լևոն Տեր-Պետրոսյանի` 1992 թվականին «Կոմսոմոլսկայա պրավդայի» թղթակցի հետ հարցազրույցում   այն միտքն է ասել, թե Ղարաբաղի ժողովրդի ինքնորոշման իրավունքն իրականալի է միայն Ադրբեջանի տարածքային ամբողջականության շրջանակներում, ժողովրդի խոսքով ասած, Զուրաբյանի լեզուն կապ ընկավ… զերծ մնալով «պետական գաղտնիքի բացահայտումից», վերջինիս մնում էր միայն արդարանալ. « Հարձակման ժամանակ արվում են ամենախաղաղասիրական հայտարարությունները: Մեր հայտարարություններով մենք ապահովել ենք մեր հաղթանակները»:

Պարզվում է, ըստ ՀԱԿ-ի ներկայացուցչի, արցախյան հաղթանակը  ձեռք է բերվել ոչ թե մեր նվիրյալ տղաների  արյան գնով ու ողջ հայ ժողովրդի նվիրման շնորհիվ,  այլ  ընդամենը` ՀՀՇ-ի հայտարությունների…

ArmAr.am