Թուրքիայի սահմանադրական դատարանը դեկտեմբերի 8-ին պետք է քննարկի քրդական «Ժողովրդավարական հասարակություն» կուսակցության փակման հայցը։ Խոսքը վերաբերում է մի կուսակցության մասին, որը այսօր 21 տեղ է զբաղեցնում Թուրքիայի 550 տեղանոց խորհրդարանում:

Շեշտենք, որ կուսակցությունը փակելու փորձեր բազմիցս են եղել:

Հայցը, որը քննարկվելու է վաղը, ներկայացվել էր դեռևս 2007թ. երկրի գլխավոր դատախազության կողմից: Կուսակցությանը մեղադրվում է «Քրդական աշխատավորական կուսակցության» հետ կապեր ունենալու մեջ: Մեղադրական հայցում   կուսակցությունը փակելուց բացի նաև պահանջ կա` թույլ չտալ կուսակցության ղեկավար Ահմեդ Թյուրքին և 220 անդամներին զբաղվել քաղաքական գործունեությամբ:

Հիշեցնենք, որ Թուրքիայի սահմանադրության համաձայն, կուսակցությունը փակելու համար անհրաժեշտ է, որ Սահմանադրական դատարանի 11 անդամներից 7-ը կողմ քվյարկեն:

Տեղեկացնենք նաև, որ քրդական «Ժողովրդավարական հասարակություն» կուսակցությունը առանց վախի շարունակում է իր քաղաքական գործունեությունը: Այսօր կուսակցությունը Թուրքիայի հարավ-արևելյան Հաքքարի նահանգի Շեմդինլի ավանում կազմակերպել էր հանրահավաք, որը ավարտվել է չարտոնված երթով։ Ոստիկանները փորձել են կասեցնել երթը, սակայն ցուցարարները սկսել են քարկոծել ոստիկաններին, ավելին ճանապարհին գտնվող դպրոցի դիմաց կանգնեցրած թուրքական դրոշը իջեցրել  և այրել են այն։

Թուրքական «CNN Turk» հեռուստալիքը հայտնել է, որ ցուցարարներին ցրելու նպատակով օգտագործվել է արցունքաբեր գազ, ձերբակալվել է 8 մարդ։

ArmAr.am