Ադրբեջանաթուրքական լրատվամիջոցներում տեղեկատվական պատերազմի գործոնների առկայությունը հաստատում է, որ այդ երկրները վարում են լայնածավալ քարոզչական պատերազմ` ընդդեմ Հայաստանի: Հակահայկական քարոզչության տարածման ծավալներն ու ինտենսիվությունը, փորձագետների գնահատմամբ, իր վտանգավորությամբ չի զիջում ռազմական գործողություններին:

Վերոնշյալ երկրների լրատվամիջոցների գործունեությունը սովորաբար այսպես է բնորոշվում` նրանք գործում են «մեկ մտքի տակ», ինչը նշանակում է, որ պետության, ազգի շահերին առնչվող թեմաների շուրջ նրանք մեկ միասնական մոտեցում ունեն, հանգամանք, որը, ցավոք,  բացակայում է հայաստանյան ԶԼՄ-ներում: Ավելին` որոշ լրատվամիջոցներ շատ հաճախ հայտնվում են հակառակորդի կողմից հրահրված տեղեկատվական ծուղակում, բառացիորեն վերատպելով և հայ հանրությանը հրամցնելով ադրբեջանաթուրքական քարոզչամեքենայի շրջանառած կեղծիքը:

Հայկական ԶԼՄ-ները տեղեկատվական դաշտում միասնաբար գործելու և այդ պայքարը համատեղ մղելու անհարաժեշտություն ունեն:

Այս մտահոգությամբ` մի խումբ լրագրողներ ու վերլուծաբաններ, համատեղելով իրենց ներուժը ձեռնամուխ  եղան նոր` «ԱրմԱր» էլետրոնային օրաթերթի ստեղծմանը (ի դեպ, անվան մեջ օգտագործված է Արմենիա և Արցախ անվանումների առաջին վանկերը):

«ԱրմԱր»-ի նպատակն է` ուժերի ներածին չափով ներազդել ու չեզոքացնել հակահայկական քարոզչությանը: Իսկ որպեսզի այդ ներազդեցությունը լինի առավել հզոր «ԱրմԱր»-ը համագործակցության առաջարկով դիմում է` այս հարցում շահագրգիռ   հասարակական ու քաղաքական կազմակերպություններին, գերատեսչություններին, վերլուծաբաններին, լրատվամիջոցներին:

Ասենք նաև, որ համագործակցելով Ժուռնալիստների միության հետ, «ԱրմԱր»-ը հետայսու հիշյալ սրահում   կկազմակերպի ասուլիս-քննարկումներ. այն մեր գիտական, քաղաքական  շրջանակների համար

կծառայի որպես հարթակ` ազգանպաստ դիտարկումների ներկայացման համար:

«ԱրմԱր»-ի խմբագրակազմ