Երեխայի  համար ամանորյա անակնկալները լիարժեք  դարձնելու համար ծնողները փորձում են ձմեռ պապի ու ձյունանուշի հեքիաթը գոնե մի քանի ակնթարթ  իրականություն դարձնել:

Եվ ահա ծնողական այս մե~ծ ցանկությունն էլ պատճառ դարձավ, որ մեզանում ձմեռ պապ-ձյունանուշների հեքիաթը վերածվի մի  յուրօրինակ  բիզնեսի:

Այս տարի մեր աչքից չվրիպեց այն փաստը, որ ի տարբերություն նախորդ տարիների, երբ  Հանրապետության գլխավոր հրապարակում կարելի էր հանդիպել ձմեռպապ-ձյունանուշների «հոծ բազմությանը», ապա այսօր` նրանք բացակայում են, իսկ   տոնական անցուդարձին ուշիուշով հետևում է հրապարակի միակ ձմեռ պապը:

Երևանի գլխավոր տոնածառի միակ  «տերն ու տնօրենը», շատ զգուշավոր էր մեզ հետ զրույցում: Անգամ խուսափեց ու գործընկեր-ձմեռպապիկների տեղն ասել չցանկացավ:  Ո՞ւր են անհայտացել մի քանի տասնյակ ձմեռպապերն այս տարի: Պարզեցինք, որ նրանց բացակայության պատճառն, ամենևին էլ,  արևշող ու տաք եղանակը չէ. Իսկ պատճառը  շատ ավելի լուրջ է:

Պարզվում է, որ  նախորդ տարիներին   մեր երիտասարդ ձմեռ պապերը, մոռանալով  իրենց իրական դերը, թերևս մի քիչ էլ գինովցած` իրենց, մեղմ ասած, ձմեռ պապիկին վայել չեն պահել: Հրապարակում  կարելի էր հադիպել, օրինակ,  ծխախոտը բերանին կամ օղու շիշը ձեռքներին  ձմեռ պապերի: Ծնողների դժգոհությունն էլ իր դերն ունեցավ, ու  քաղաքային իշխանությունները որոշեցին այս տարի արգելել նրանց առատ ներկայությունը Հանրապետության հրապարակում:

Բայց էլ ի՞նչ տոն, առանց ձնեռ պապի ու ձյունանուշի: Որքան էլ նրանց թիվը կրճատվի, միևնույն է` նրանք ողջ ամանորի ընթացքում մեզ հետ են լինելու: Մինչ մեր փոքիկները կշարունակեն իրենց ձմեռային հեքիաթները հյուսել, մեր ծնողներին առավելապես հետաքրքրում է իրականությունը. ի՞նչ արժեն «ձմեռ պապերը», և ունե՞ն մեր ծնողները ֆինանսական անհրաժեշտ հնարավորություն` իրենց փոքրիկների ձմեռային հեքիաթը` մի քանի ակնթարթով  իրականություն դարձնելու համար:

Եվ այսպես. Հանրապետության հրապարակում Ձմեռ պապի հետ` սեփական լուսանկարչական ապարատով նկարվելն արժե 300 դրամ,իսկ լուսանկարչի «աջակցությամբ»` 500 դրամ: Չնայած հրապարակի մինուճար  Ձմեռ պապը ձյունանուշին ու նվերներով լի պարկը «մոռացել» է Լապլանդիայում, բայց և այնպես, չի հրաժարվում անձամբ այցելել ցանկացողների բնակարանները և ուրախացնել մանուկներին:  Ի գիտություն սիրելի ծնողներին` ձմեռ պապի` մեկ այցի արժեքը  15 000 դրամ է: Ու քանի որ մեր ձմեռ պապը պետք է հասցնի այցելել  բոլոր մանուկներին, նա ձեր տանը կհյուրընկալի ընդամենը մի քանի րոպե…Եվ ուրեմն, 15 000 դրամ, ընդամենը` մի քանի րոպեի դիմաց: Լավ է, թե վատ` կորոշի ձեր գրպանի պարունակությունը:

Իսկ եթե շատ եք ցանկանում, որ ձեր փոքրիկը մի քիչ ավել վայելի ձմեռ պապի ներկայությունը, ուրեմն, թափ տվեք ձեր գրպաններն ու  50 000 դրամ վճարելով` գիշերը ժամը 12-ին դարձրեք նրան  ձեր տան սպասված հյուրը:

Ի դեպ, կենացները թանկանում են, երբ ձմեռ պապիկին միանում է իր  սիրելի թոռնուհին` ձյունանուշը: Նման այցերն անցնում են  70 000 դրամի շեմն ու մոտենում 100 000-ին:

Դե ինչ, մեզ մնում է Ամանորի շեմին` բազմաթիվ բարեմաղթանքների հետ միաժամանակ, մեր  հայ ծնողներին ցանկանալ  ֆինանսական մեծ հաջողություններ, որպեսզի հայ մանուկների ձմեռային պայծառ ու գունագեղ հեքիաթը երբեք ավարտ չունենա…

Լիլիթ Պողոսյան

ArmAr.am