Հունվարի 10-ը Չինսուրայի Ս. Հովհաննես Մկրտիչ եկեղեցու ուխտի օրն էր:

Կալկաթայի հայ համայնքը` մասնակցությամբ ճեմարանի սաների և ուսուցիչների, ուխտի  գնաց Կալկաթայից 65 կմ հեռավորության վրա գտնվող վերոհիշյալ  եկեղեցին:

Հնդկաստանի Արևմտյան Բենգալիա նահանգում գտնվող Չինսուրա (Չիչրա) բնակավայրը ժամանակին եղել է նշանավոր առևտրային կենտրոն: 1695թ. կառուցած Ս. Հովհաննես Մկրտիչ եկեղեցին համարվում է Բենգալիայում կառուցված երկրորդ հնագույն քրիստոնեական եկեղեցին, իսկ Հնդկաստանի հայ գաղութի կանգուն եկեղեցիների շարքում` առաջինը:

Եկեղեցու տարածքում գտնվող հնագույն գերեզմանատանը պահպանվել է հայատառ 180 գերեզմանաքար:

Կալկաթայի Ս. Նազարեթ Մայր եկեղեցում պահվող Սուրբ Հովհաննես Մկրտչի մասունքը տարին մեկ անգամ է դուրս բերվում` Սրբի ուխտի օրը:

Օրվա պատարագիչն էր Հնդկահայոց հոգևոր հովիվ Հայր Խորեն Հովհաննիսյանը: Հընթացս պատարագի Հայր Խորենը Ս. Հովհաննես Մկրտչի Ոսկե Աջով օրհնեց ներկաներին և իր պատգամը փոխանցեց հավատացյալ հայորդիներին:

Ուխտագնացությունը հոգևոր վերանորոգության և վերազարթոնքի առիթ եղավ հնդկահայերի համար:

ArmAr.am