ԵԽԽՎ նորընտիր նախագահ Մևլութ Չավուշօղլուն կողմնակալ դիրքորոշմամբ չի կարող դրական դերակատարություն ստանձնել Լեռնային Ղարաբաղի հակամարտության կարգավորման գործում: Երեկ  Panorama.am-ի հետ զրույցում` արձագանքելով ադրբեջանական «ԱՊԱ» գործակալության տարածած հարցազրույցին, նման գնահատական հնչեցրեց Եվրոպայի խորհրդում Հայաստանի Հանրապետության մշտական ներկայացուցիչ Զոհրաբ Մնացականյանը:

«ԱՊԱ» գործակալությունը հրապարակել է Մևլութ Չավուշօղլուի հետ հարցազրույցի տեքստ, որտեղ թուրք խորհրդարանականին վերագրվում են կողմնակալ գնահատականներ` կապված ԼՂ հիմնախնդրի կարգավորման և հայ-թուրքական հարաբերությունների բնականոնացման հետ:

«ԱՊԱ»-ի կայքում զետեղված տեքստի համաձայն, ԵԽԽՎ նախագահը, մասնավորապես, փորձել է հայ-թուքրական կարգավորման գործընթացի վերաբերյալ նախապայմաններ առաջադրել և միակողմանի մեկնաբանություններ է արել ղարաբաղյան պատերազմի հետևանքների մասին:

Արձագանքելով այս փաստին` Զոհրաբ Մնացականյանը փոխանցել է.

«Իմ կարծիքը բացահայտ է և տրամաբանական: Ես վստահ չեմ, որ սա համապատասխանում է իրականությանը: Վստահ չեմ, որ «ԱՊԱ»-ն գրել է` ինչպես որ կա: Բայց , եթե իսկապես դա համապատասխանում է իրականությանը, ապա կարծում եմ, և բոլորս էլ հասկանում ենք դա, որ նման կողմնակալ դիրքորոշումը հանում է բոլոր հիմքերը ԵԽԽՎ նախագահի համար` դրական դեր խաղալու ղարաբաղյան կարգավորման գործում»:

Զոհրաբ Մնացականյանը նշեց, որ խնդիրը միջխորհրդարանական գործունեության տիրույթում է և ԵԽԽՎ-ում Հայաստանի պատվիրակության անդամներն այս պահին արդեն քայլեր են ձեռնարկում` իրավիճակի հետ կախպված հստակեցումներ մտցնելու և համապատասխան գործողություններ ձեռնարկելու ուղղությամբ:

Պատասխանելով մեր հարցին, որ եթե հրապարակված տեքստը համապատասխանի իրականությանը, Հայաստանն ինչպես կարձագանքի այդ իրողությանը և ինչ քայլեր կձեռնարկի` ԵԽ-ին ու միջազգային հանրությանը տեղյակ պահելու, որ պարոն Չավուշօղլուն ԵԽԽՎ նախագահի բարձր պաշտոնը ծառայեցնում է իր հայրենի երկրի ու նրա դաշնակցի նեղ շահերը սպասարկելու և միակողմանի քաղաքական դիրքորոշումներ ներկայացնելու համար, նա ասաց` «Երբ մենք կճշտենք, կհաստակեցնենք բոլոր մանրամասները, դրանից հետո, բնականաբար, քայլեր կձեռնարկենք»,-ապա վստահեցրեց,  որ  կլինի նաև հանդիպում ու զրույց  Մևլութ Չավուշօղլուի հետ