Ամերիկյան քաղաքական վերլուծաբանները որոշել են առավել քան լրջորեն զբաղվել`  կովկասյան երկրների հիմնախնդիրներով, բնականաբար,  առաջնորդվելով ամերիկյան հետաքրքրությունների շահերով: Լա՞վ է, թե՞ վատ: Ինչպես ասում են` քաղաքականության մեջ «լավ»-ն ու «վատ»-ը խիստ հարաբերական են, և պայմանավորված այդ պահին թելադրվող կոնկրետ շահերով: Մի բան հստակ է, երբ   գերտերություններն իրենց քաղաքական հետաքրքրություններն առավել քան սևեռում են այս կամ այն տարածաշրջանի հիմնախնդիրների լուծման  վրա, այդ հատվածի փոքր երկրներից պահանջվում է լինել առավել զգոն ու  քաղաքականապես  ճկուն:

Ինչևէ, կովկասյան ու, մասնավորապես, Հարավային Կովկասի հիմնախնդիրներով  հետայսու առավել խորությամբ զբաղվելու է Միացյալ Նահանգների` հարյուրամյա պատմություն ունեցող Կառնեգի վերլուծական կենտրոնը:

Վաշինգտոնյան փորձագետները նկատում են, որ եթե նախկինում իրենք այս տարածաշրջանի երկրները դիտարկել են առանձին-առանձին, ապա վրաց -օսական պատերազմը ցույց տվեց, որ  այս տարածաշրջանում բոլոր հակամարտությունները շաղկապված են իրար հետ, հետևապես, մոտեցումն ու հնարավոր լուծումների փնտրտուքն էլ  պետք է իրականացնել ամբողջության մեջ:

Կառնեգի վերլուծական կենտրոնի հայտնի փորձագետ Ջեյմս Քոլինզի ուշադրության կենտրոնում այսօր հայ-թուրքական հարաբերությունների սկսված գործընթացն է: Նրա կարծիքով ամերիկյան դիվանագիտությունը հայ-թուրքական հարաբերություններով  պետք է զբաղվի որպես առաջնային խնդիր: Սակայն նա միաժամանակ  կարծում է, որ այս հարցում ԱՄՆ-ը միայնակ չպետք է գործի, այլ պետք է ներագրավի նաև եվրոպական գործընկերների «ներուժը»:

Ի դեպ, տեղեկացնենք, որ Ջեյմս Քոլինզը ժամանակին եղել է խոշոր  հակախորհրդային փորձագետներից մեկը, մի առ ժամանակ էլ պաշտոնավարել է Թուրքիայում:

Վաշինգտոնյան փորձագետները այս տարածաշրջանի մյուս կարևորագույն խնդիրը համարում են արցախյան հիմնախնդիրը և այս հարցում ևս կոչ են անում ԱՄՆ իշխանություններին` սևեռել  ողջ ուշադրությունը խնդրի լուծման ուղղությամբ:

Ամերիկյան փորձագետներից մեկը նույնիսկ կարծիք է հայտնել, թե հասունանում է այն պահը, որ «Ղարաբաղի հայերը պետք է մասնակցեն բանակցություններին, քանի որ դա վերաբերում է այն տարածքներին, ուր նրանք ապրում են»: