Թուրքիայում կրկին բարձրաստիճան զինվորականի ինքնասպանության դեպք է արձանագրվել: Թուրքական «Hurriyet» թերթի տեղեկացմամբ` Իզմիրի ռազմածովային ուժերի հրամանատարությունում ծառայող, շտաբի գնդապետ Բերք Էրդեմն իրեն ամրակցված ատրճանակով ինքնասպանություն է գործել իր  բնակեցրած զինվորականների հանրակացարանում: Սկսվել է հետաքննություն ինքնասպանության հանագմանքները պարզելու համար:

«Hurriyet»-ն ուշադրություն է հրավիրել այն հանգամանքի վրա վերջին շրջանում թուրքական զինուժում բավական հաճախադեպ է դարձել զինվորականների ինքնասպանությունները կասկածելի հանգամանքներում: Աղբյուրի համաձայն` միայն 2009 թվականին ինքնասպան են եղել թուրքական բանակի 5 բարձրաստիճան զինվորականները, որոնք այս կամ այն չափով առնչվել են «Էրգենեքոն»-ի գործով դատավարությանը:

Հիշեցնենք, որ «Էրգենեկոն»-ը ենթադրյալ ահաբեկչական կազմակերպություն է, որը ծրագրել էր իրականացնել մի շարք սպանություններ Թուրքիայում, այդպիսով երկրում ստեղծել քաոսային իրավիճակ և իրականացնել հեղաշրջում։ Դատավարության ընթացքում պարզվել է, որ այս խմբավորման անդամները նպատակ են ունեցել սպանել Պոլսո հայոց պատրիարք Մեսրոպ Մութաֆյանին, Սեբաստիայի հայ համայնքի առաջնորդին, Ալևիների առաջնորդին, Թուրքիայի վարչապետ Ռեջեփ Թայիփ Էրդողանին։