Օրերս Վրաստանի խորհրդարանի խոսնակ Դավիթ Բակրաձեի եւ Թուրքիայի փոխվարչապետ Բուլետ Արինի միջեւ կայացած հանդիպման ժամանակ կողմերն անդրադարձել են երկու երկրների տնտեսական եւ էներգետիկ նախագծերին: Այս մասին հայտնում են վրացական լրատվամիջոցները:

«Վրաստանը եւ Թուրքիան տնտեսապես ինտեգրված երկրներ են: Իսկ տնտեսական համագործակցությունը կայունության երաշխիքն է»,- նշվել է հանդիպման ժամանակ:

Բակրաձեն իր հերթին առաջարկել է թուրքական կողմին իր դերակատարությունն ունենալ Վրաստանի անջատված շրջանների առնչությամբ վրացական կառավարության ռազմավարության իրականացման գործում:

Հիշեցնենք, որ կառավարության կողմից հունվարի վերջին ներկայացված փաստաթուղթն առաջարկում է երկխոսություն սկսել Թուրքիայի աբխազական սփյուռքի հետ, որը շատ բացասաբար է տրամադրված Վրաստանի իշխանությունների նկատմամբ: