Այսօր լրանում է PKK-ի առաջնորդ Աբդուլլահ Օջալանի ձերբակալման 11-րդ տարին, ով  ցմահ բանտարկության է դատապարտված  և «պատիժը» կրում է Թուրքիայի  Իմրալի կղզում։  Սա առիթ է հանդիսացել, որպեսզի Թուրքիայի մի շարք քաղաքներում բողոքի երթեր և բախումներ տեղի ունենան:

Ուրֆայում քրդական «Խաղաղություն և ժողովրդավարություն» կուսակցությունը հանրահավաք է անցակցել, որին հաջորդել է երթ։ Թուրքական ոստիկանությունը մեծաքանակ ուժեր է հանել երթի մասնակիցների դեմ։ Քրդական կուսակցության պատգամավոր Իբրահիմ Բինիջին բանակցության մեջ է մտել ոստիկանության հետ, որից հետո թույլատրվել է երթը շարունակել, բայց  առանց կարգախոսների։ Սակայն երթի մասնակիցներն ընդվզել են այդ որոշման դեմ։ Ձերբակալվել են երթի մասնակից 10 ցուցարարներ:

Հաքքարիում և Յուքսեքովայում էլ անմիջական բախումներ են տեղի ունեցել ոստիկանության և քուրդ ցուցարարների միջև: Ցուցարարները բարիկադներ են կառուցել և քարկոծել ոստիկանությանը։ Նրանց ցրելու համար ոստիկանները են արցունքաբեր գազ և ջրցան մեքենաներ են գործի դրել:

Իսկ Մերսինում բողոքի անօրինական ակցիաներ կազմակերպելու կասկածանքով այսօր թուրք ոստիկաններն արդեն 44 մարդ են ձերբակալել:

ArmAr.am