Այսօր  ԱԺ պատգամավոր, ԱԺ տնտեսական հարցերի մշտական հանձնաժողովի նախագահ Վարդան Այվազյանն ու ԱԺ պատգամավոր, ՀՅԴ խմբակցության անդամ Արծվիկ Մինասյանը բանավեճի էին հրավիրված «Հայելի» ակումբում:

Բանավեճի թեման էր` Տեղական ինքնակառավարման մարմինների մասին հարկային փաթեթը, որն իր մեջ ներառում է հողի, գույքի հանրային տարածքների զբաղեցման և այլ հարկատեսակներ:

ՀՅԴ ներկայացուցչի հավաստմամբ, այդ հարկատեսակների ներմուծումը չունի ոչ տնտեսական, ոչ սոցիալական, ոչ էլ իրավական ու քաղաքական հիմնավորում:

«Չկա որևէ տնտեսական հաշվարկ, որն ապահովի տեղական հարկերի այս տեսակների ներմուծման տնտեսական ազդեցությունը և նպատակահարմարությունը: Սոցիալական առումով այս ճգնաժամի պայմաններում սա լրացուցիչ բեռ է դառնալու»,- ասաց Ա. Մինասյանը:

Վերջինիս մտահոգությունը նաև այն ,է որ  հանրային տարածքների զբաղեցման հարկատեսակը կարող է օգտագործվել որպես քաղաքական գործիք, հատկապես «համայնքների այն անբարեխիղճ ղեկավարների կողմից, ովքեր աչքի են ընկել արջի ծառայություն մատուցելու իրենց անհագ ցանկությամբ»:

Վարդան  Այվազյանն այլ կերպ է մեկնաբանում օրենսդրական նախաձեռնության բուն բովանդակությունը.«ՏԻՄ-երի համար ստեղծել ֆինանսական կարողություններ և տալ դրանք հավաքագրելու մեխանիզմներ»:

Համաձայնելով Արծվիկ Մինասյաի հետ, սակայն Վարդան Այվազյանը նկատել է.« «Սկզբունքորեն ընդունելի է ամբողջ գաղափարախոսությունը, բայց ճշգրտելու խնդիր կա, թե որ հարկատեսակն իրենից ինչ է ներկայացնում»:

«Դուք օրենքը չեք քննադատում:  Այ, երբ որ խորհրդարան կբերեին փաթեթը, այն ժամանակ էլ եկեք կշեռքի նժարին  դնենք խնդիրն ու տեսնենք, թե ինչպես գտնել հարցի լուծումը»,- ասել է Վարդան Այվազյանը:

Արծվիկ Մինասյանը հակադարձել է` ուրեմն  տվեք այդ կարևորագույն հարցի լուծումը: « Մնացածը, կողքից «ոսկորները», ինչո՞ւ  եք խցկել»: