Փետրվարի 24-ին «Առավոտ» եւ «Չորրորդ ինքնիշխանություն» թերթերի ֆոտոլրագրող Գագիկ Շամշյանը բռնության էր ենթարկվել Հայաստանի գլխավոր դատախազության շենքի մոտ:

Այսօր Հայաստանի գլխավոր դատախազ Աղվան Հովսեփյանը խոստացել է պարզել  ֆոտոլրագրողի վրա կատարված հարձակման պատճառը:

Դատախազության կոլեգիայի նիստից հետո կայացած ճեպազրույցի ժամանակ Շամշյանը կատարվածի մասին տեղեկացրել է ՀՀ դատախազ Աղվան Հովսեփյանին: Վերջինս պահանջել է դեպքի մասին գրավոր հաղորդում ներկայացնել: «Ես որպես գլխավոր դատախազ, պահանջում եմ, որ Դուք ներկայացնեք մեզ Ձեր տեսանյութը եւ ձայնագրությունը, որպեսզի մենք պարզելու հնարավորություն ունենանք»»,- ասել է պրն  Հովսեփյանը:

Հիշեցնենք, որ այդ օրը լրագրողը դատախազության շենքի մոտ փորձել է լուսանկարել դատախազության աշխատակիցներին, երբ իր վրա է հարձակվել 30-ամյա մի երիտասարդ, նա լրագրողի հասցեին սեռական հայհոյանքներ է տեղացել եւ մի քանի րոպե շարունակ հարվածներ հասցրել Շամշյանի դեմքին ու մարմնի այլ մասերին: Ի դեպ, պարզվել է, որ հարձակում կատարած անձը  ոստիկանության քննչական գլխավոր վարչության աշխատակից է:

ArmAr.am