Նախագահ Սերժ Սարգսյանին այսօր իր հավատարմագրերն է հանձնել Հայաստանում Չինաստանի Ժողովրդական Հանրապետության նորանշանակ դեսպան Թիան Չանչունը:
Շնորհավորելով դիվանագետին պաշտոնը ստանձնելու առթիվ` ՀՀ նախագահն ասել է, որ Հայաստանը հետաքրքրված է Չինաստանի հետ տարբեր ոլորտներում հարաբերությունների խորացմամբ:
Նորանշանակ դեսպանը Հայաստանի Հանրապետության Նախագահին հաղորդել է ՉԺՀ Նախագահ Հու Ձինթաոյի ողջույնները: Նա նաև ընդգծել է Չինաստանի և չին ժողովրդի խորը հարգանքը Հայաստանի ու հայ ժողովրդի նկատմամբ:

Դեսպան Չանչունն ասել է, որ իր երկրի կառավարությունը մեծ նշանակություն է տալիս Հայաստանի հետ համագործակցության զարգացմանը: Նրա խոսքով` դիվանագիտական հարաբերությունների հաստատումից ի վեր` հայ-չինական քաղաքական, տնտեսական համագործակցությունը, հումանիտար կապերը հետևողականորեն զարգանում են, և այսօր արդեն տեսանելի են արդյունքները:

ՀՀ նախագահն ու Չինաստանի դեսպանը քննարկել են նաև երկու երկրների միջև առևտրատնտեսական փոխգործակցության զարգացմանը, համատեղ ծրագրերին վերաբերող հարցեր: Նրանք նշել են, որ ավարտին է մոտենում ամենախոշոր նախագծերից մեկը` քլորոպրենային կաուչուկի արտադրության համատեղ ձեռնարկության կառուցումը, որի գործարկումը տնտեսական կապերի զարգացման համար լուրջ խթան կլինի:

Կողմերը բարձր են գնահատել Հայաստանի և Չինաստանի արդյունավետ գործակցությունը միջազգային կառույցներում, միմյանց խնդիրների նկատմամբ անկողմնակալ ու հավասարակշիռ դիրքորոշումը:

ArmAr.am