Մարտի 17-ի առավոտյան Գարեգին Բ Կաթողիկոսը և Մոսկվայի և Համայն Ռուսիո Պատրիարք Կիրիլ Առաջինը երկու Եկեղեցիների հոգևոր դասի ուղեկցությամբ այցելեցին Ծիծեռնակաբերդի հուշահամալիր` հարգանքի տուրք մատուցելու բյուրավոր հայ նահատակների անմահ հիշատակին:

Հուշահամալիրում երկու հովվապետերը ծաղկեպսակներ զետեղեցին, ապա անմար կրակի մոտ Նորին Սրբության նախագահությամբ կատարվեց հոգեհանգստյան արարողություն, որից հետո Կիրիլ Պատրիարքն աղոթեց Հայոց ցեղասպանության զոհերի հոգիների հանգստության համար:

Աղոթքից հետո Հայրապետներն այցելեցին Հայոց Ցեղասպանության ինստիտուտ-թանգարան, ուր թանգարանի տնօրեն Հայկ Դեմոյանի ուղեկցությամբ շրջեցին ցուցասրահներում: Այնուհետև Մոսկվայի և Համայն Ռուսիո Պատրիարքը գրառում կատարեց հյուրերի հուշամատյանում:

Վերջում Կիրիլ Պատրիարքը ծառատունկ կատարեց Հիշողության պուրակում:

ArmAr.am