ՀՀ ԱԺ Առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանն այսօր լրագրողների հետ հանդիպմանն անդրադարձավ դեղերի շուկայում առկա խնդիրներին ու դրանց լուծմանը միտված համապատասխան մարմինների գործունեությանը:

Նա նշեց, որ մեր պետությունն այսօր ի վիճակի չէ իրականացնել բոլոր դեղերի կարգավորումը: «Լավ կլինի սկսել հիմնական դեղերի ցանկից, որն ընդգրկում է այն դեղերը, որոնք կարող են մեր խնդիրների 80 տոկոսը ծածկել: Շատ դժվար կլինի կարգավորել մի դեղի գին, որը Հայաստանում օգտագործվում է 10-15 հիվանդի համար: Մենք ունենք խնդիր ժամկետաց դեղերի, որակի, գների, տարածքային և ֆինանսական հարցերի հետ»,- ասաց Ա.Բաբլոյանը:

Նրա հիշեցմամբ, Հայաստանում դեռ ավելի քան 16 տարի առաջ ստեղծվել է Դեղերի որակի վերահսկման գործակալությունը, որտեղ մշակվում են այն ստանդարտները, որոնք հաստատվում են կառավարության կողմից և հետագայում վերահսկվում որպես չափանիշ: Տեսչական վերահսկողությունը դրված է Առողջապահության նախարարության վրա, հաստատված են մեխանիզմները, որոնցով պետք է վերահսկվեն, սակայն Ա.Բաբլոյանի խոսքով, դա բավարար չէ, և այսօր Ազգային ժողովը սպասում է նոր օրենսդրական նախաձեռնության:

«Այն, ինչ մենք հիմա նոր օրենքի տեսքով կներկայացնենք, էլ ավելի կխստացնի, որպեսզի հնարավորություն չլինի խուսափել այս կամ այն գործընթացից դեղերի վերահսկման հարցում: Նույնիսկ չվերահսկելու փոքրիկ հնարավորությունները պետք է բացառվեն: Նախատեսում ենք, որ նույնիսկ քրեական պատասխանատվություն կրեն դեղերը կեղծելու համար»,- հայտարարեց Արա Բաբլոյանը` հավելելով, որ իրենց հիմնական նպատակը որակյալ դեղ ունենալն է: