«Մեծ Բրիտանիայի կողմից Հայոց ցեղասպանության ճանաչումը ոչ թե Կառավարության, այլ խորհրդարանի քննարկելիք հարցն է»,- լրագրողների հետ հանդիպման ժամանակ հայտնեց Հայաստանում Մեծ Բրիտանիայի դեսպան Չարլզ Լոնդսեյլը` ի նկատի ունենալով, որ նմանօրինակ հարցով անհրաժեշտ է դիմել ոչ թե իրեն` Կառավարության ներկայացուցչին, այլ խորհրդարանի որևէ ներկայացուցչի:

Միևնույն ժամանակ դեսպանն ընդգծեց, որ Կառավարության դիրքորոշման մեջ` այդ հարցի հետ կաված, ոչ մի փոփոխություն չի տեսնում:

«Մենք ցավում ենք այն ոճրագործությունների ու տառապանքների համար, որ հայ ժողովուրդը կրել է դարասկզբին»,- ընդգծեց Չ. Լոնդսեյլն ու հավելեց. «Այն ժամանակվա Մեծ Բրիտանիայի կառավարությունն արդարացիորեն դատապարտել է 20-րդ դարասկզբի իրադարձությունները»:

Ամփոփելով իր խոսքը` դեսպանը հայտնեց. «Չմոռանալով զոհվածներին` մենք պետք է նայենք առաջ և շարունակենք խրախուսել հարաբերությունների հաստատմանը` ապագա սերունդների համար»:

ArmAr.am