Անձրևային եղանակը լրացուցիչ դժվարություններ է ստեղծել Լեռնային Ղարաբաղի Հանրապետությունում խաղողի բերքահավաքի կազմակերպման համար: Այս տարի  սպասվում է 14-15 հազար տոննա բերք:  Այսօրվա դրությամբ, հիմնական մթերողը` Ստեփանակերտի կոնյակի գործարանը, արդեն իսկ ընդունել է 2,5 հազար տոննայից ավելի խաղող: Ստեփանակերտի կոնյակի գործարանը, կախված իրացման հնարավորություններից,  այս տարի նախատեսել էր ընդունել ընդամենը 4,5 հազար տոննա խաղող:  Սակայն այդ թիվը կառավարության հետ բանակցություններում փոխվել է և այժմ կազմում է 6000 տոննա:

Մթերումը  սկսված է Մարտունու և Կարմիր Շուկայի մասնաճյուղերում: Ընդունում են Ասկերանի, Մարտունու և Ջեբրայիլի այգիներից հավաքված բերքը: Խաղողի տեխնիկական տեսակների  համար  մթերողները կառավարության  հետ համաձայնեցրել են կիլոգրամի դիմաց 100 դրամ գին: Վճարումը կատարվելու է մթերումից հետո մեկ ամսվա ընթացքում:  Մթերողներին կառավարությունը վարկի սուբսիդավորում է խոստացել: «Արցախբանկը» վարկ կտրամադրի, իսկ տոկոսները կսուբսիդավորի պետությունը: Մթերողները վճարելու են ընդամենը 6 տոկոս: Արցախի ամենախոշոր մթերողի` Ստեփանակերտի կոնյակի գործարանի տնօրեն Վլադիկ  Ալիբաբայանի խոսքերով, առայժմ վճարումները Ստեփանակերտի կոնյակի գործարանը կատարում է սեփական միջոցներով:  Պետության ու  բանկի համատեղ  աջակցությանը  դեռ չեն դիմել, իսկ մյուս մթերողը` Հադրութի գինու գործարանը, որը պատկանում է «Միկա»  կոնցեռնին, որոշել է չօգտվել պետական աջակցությունից:

ArmAr.am

Թեգեր` ԼՂՀ, Խաղող, Կոնյակի գործարան, մթերում, Ստեփանակերտ