Այսօր լրագրողների հետ հանդիպման ժամանակ ՀՀ գյուղատնտեսության նախարար Գերասիմ Ալավերդյանն ասել է, թե «մի քանի օրից մենք մեր հողի բերքը կստանանք, և գները կիջնեն»։ Իսկ գյուղմթերքի բարձր գներն, ըստ նախարարի, միայն գյուղացիական տնտեսություններում տարածված հիվանդություններով չէ պայմանավորված։ Այնուհանդերձ այդ գործոնը ևս էական ազդեցություն է ունեցել գյուղմթերքի գնագոյացման վրա։ Գերասիմ Ալավերդյանը նշել է, որ գյուղմթերքի հիվանդություններն այս տարի հաճախակիացել են որպես հորդառատ տևական անձրևների և գերխոնավության հետևանք։ «Դա լոլիկի քաղցկեղն է, ցորենի ժանգը։ Միջոցառումներ իրականացվում են։ Այո, տարածքներ կան, որ այս տարի լոլիկը երեք անգամ են սածիլել։ Հիմնական թանկացման պատճառը դա է»,-ասել է գյուղնախարարը՝ հավելելով, որ Հայաստանում առկա են բոլոր թունաքիմիկատները։