Հունաստանի խորհրդարանի նախագահ Ֆիլիպոս Պետսալնիկոսի հետ հանդիպման ժամանակ ՀՀ ԱԺ նախագահը կարևորել է  երկու երկրների միջև միջխորհրդարանական կապերի զարգացումը և հետագա խորացումը` նշելով, որ միջխորհրդարանական շփումները բավարար մակարդակի վրա չեն և զարգացման մեծ ներուժ ունեն: Այս համատեքստում նա անհրաժեշտ համարեց  աշխուժացնել Հայաստանի և Հունաստանի խորհրդարանական պատվիրակությունների փոխայցելությունները`  ապահովելով դրանց շարունակական բնույթը, ինչպես նաև ակտիվացնել պատգամավորական բարեկամության խմբերի գործունեությունը:  Հովիկ Աբրահամյանը կարևոր համարեց նաև տարբեր միջազգային և տարածաշրջանային կազմակերպություններում երկուստեք հետաքրքրություն ներկայացնող հարցերի շուրջ երկու երկրների խորհրդարանների ներկայացուցիչների սերտ համագործակցությունը:

Պարոն Պետսալնիկոսը նույնպես կարեւորեց երկու խորհրդարանների միջեւ գործակցությունը զարգացնելու անհրաժեշտությունը եւ նշեց, որ Հունաստանի խորհրդարանում ստեղծվել է Հունաստան-Հայաստան  բարեկամության խումբ: Նա վստահություն հայտնեց, որ խմբի գործունեությունը էապես կնպաստի միջխորհրդարանական կապերի աշխուժացմանը: Հունաստանի խորհրդարանի նախագահը վերահաստատեց Հունաստան պաշտոնական այց կատարելու ԱԺ նախագահին իր հրավերը, ընդգծելով որ այն կարեւոր քայլ կլինի միջպետական հարաբերությունների խորացման գործում:

Հանդիպման ընթացքում քննարկվեցին նաեւ տարածաշրջանային զարգացումներին առնչվող հարցեր:

ArmAr.am