Հուլիսի 20-ի ԱԺ նախագահ Հովիկ Աբրահամյանի Ժնևյան վերջին հանդիպումը Ճապոնիայի Ներկայացուցիչների պալատի նախագահ Տակահիրո Յոկոմիչիի հետ էր:

Հովիկ Աբրահամյանը նշեց, որ Հայաստանը մեծ կարևորություն է տալիս ասիական-խաղաղօվկիանոսյան տարածաշրջանի առաջատար երկրների, մասնավորապես` Ճապոնիայի հետ հարաբերությունների հետևողական զարգացմանը` հաշվի առնելով Ճապոնիայի  ներդրումն իր տարածաշրջանում և աշխարհում միջազգային անվտանգ մթնոլորտի ստեղծման, տնտեսության և միջազգային առևտրի, բնապահպանական հարցերում, ինչպես  նաև  զարգացող երկրներին օգնություն հատկացնելու գործում:

Պարոն Աբրահամյանը նշեց, որ այս տարվա հուլիսից Տոկիոյում գործում է Հայաստանի Հանրապետության դեսպանությունը, ինչը նոր լիցք կհաղորդի հայ-ճապոնական հարաբերությունների զարգացմանը: ԱԺ նախագահի խոսքով` Հայաստանը մեծ նշանակություն է տալիս Ճապոնիայի ներգրավվածությանը կովկասյան տարածաշրջանում և գնահատում է Ճապոնիայի ջանքերը մեր տարածաշրջանի բոլոր պետությունների հետ հավասարակշիռ և համազոր հարաբերություններ զարգացնելու համար: ԱԺ նախագահը գոհունակությամբ փաստեց, որ վերջին տարիներին Հայաստանը և Ճապոնիան արդյունավետ համագործակցում են միջազգային կազմակերպություններում մեր երկրներին հուզող հարցերի շուրջ:

Հայաստանի խորհրդարանը կարևորում է երկու երկրների խորհրդարանների միջև համագործակցության խթանումը: Այդ կապակցությամբ Հայաստանի Ազգային ժողովում արդեն ձևավորվել է Ճապոնիայի հետ խորհրդարանական բարեկամության խումբ: Բարձր գնահատելով Ճապոնիայի կառավարության կողմից Հայաստանում իրականացվող դրամաշնորհային ծրագրերը` ԱԺ նախագահը կարեւորեց  ավելի լիարժեք առևտրատնտեսական համագործակցության անցումը, համատեղ ներդրումային ծրագրերի իրականացումը:

Ճապոնիայի խորհրդարանի ղեկավարը նշեց, որ Ճապոնիան կարեւորում է Հայաստանի հետ հարաբերությունների խորացումը եւ ամրապնդումը, ինչին կնպաստի նաեւ խորհրդարանների միջեւ համագործակցության զարգացումը: Երկուստեք կարեւորվեց համագործակցությունը միջազգային կառույցներում:

ArmAr.am