Ամերիկայի հայկական համագումարը (ԱՀՀ) ողջունում է ՀՀ նախագահ Սերժ Սարգսյանի` հայ-թուրքական հարաբերությունների վերաբերյալ Սփյուռքի տեսակետները լսելու նպատակով համահայկական ուղևորություն կատարելու նախաձեռնությունը: Այս մասին ԱՀՀ տարածաշրջանային տնօրեն Արփի Վարդանյանը հայտնել է «Արմինֆո» գործակալությանը:

«Ես ողջունում եմ նախագահի այդ նախաձեռնությունը: Կարևոր է այն, որ նա կլսի աշխարհի տարբեր ծայրերում գտնվող հայկական սփյուռքի ներկայացուցիչների կարծիքներն ու կպատասխանի նրանց հուզող հարցերին»,- ասել է Արփի Վարդանյանը:

Վերջինս տեղեկացրել է, որ ԱՀՀ ներկայացուցիչները ևս նախագահ Սերժ Սարգսյանի հետ հանդիպում են ունենալու:

Սերժ Սարգսյանի համահայկական ուղևորությունը մեկնարկելու է հոկտեմբերի 1-ին: Սփյուռքի ներկայացուցիչներին լսելու նպատակով նախագահն այցելելու է Փարիզի, Նյու Յորքի, Լոս Անջելեսի, Բեյրութի ու Դոնի Ռոստովի գաղթօջախներ:

ArmAr.am