Հուլիսի 29–ին ԱՄՆ Սենատի Հատկացումների հարցերով հանձնաժողովը հավանության է արժանացրել «Ֆինանսական տարի 2011։ Արտաքին գործողությունների հատկացումների օրինագիծը», որով առաջարկվում է Հայաստանին տրամադրել 40 միլիոն ԱՄՆ դոլարի աջակցություն, այսինքն մեկ միլիոնով պակաս, քան տրամադրվել է այս տարի։ Այս մասին հաղորդում է Ամերիկայի հայկական համագումարը (ԱՀՀ)։

«Հաշվի առնելով, որ Թուրքիան շարունակում է Հայաստանին շրջափակման մեջ պահել և հրաժարվում է հարաբերությունները կարգավորել առանց նախապայմանների, Հայաստանին ԱՄՆ–ի կողմից տրամադրվող օգնության կարևորությունը չի կարող թերագնահատվել»,– ասել է հանձնաժողովի անդամ Բիանկա Կադիան–Դոդովը։

Անցած ամիս Ներկայացուցիչների պալատի պետական, արտաքին գործողությունների և հարակից ծրագրերի հարցերով հատկացումների ենթահանձնաժողովն առաջարկել էր Հայաստանին հատկացնել 44 միլիոն ԱՄՆ դոլար, իսկ Լեռնային Ղարաբաղին՝ 10 միլիոն դոլար.

«Համագումարը շարունակելու է աշխատել ինչպես Սենատի, այնպես էլ Ներկայացուցիչների պալատի հետ՝ Հայաստանի և Լեռնային Ղարաբաղի համար հնարավորինս լավագույն արդյունք ապահովելու համար»,– ասել է ԱՀՀ գործադիր տնօրեն Բրայան Արդունին։

Օրինագիծը վերջնականապես կհաստատվի   սեպտեմբերին, երբ օգոստոսյան արձակուրդից հետո կոնգրեսականները վերսկսեն իրենց աշխատանքները։