Շարունակվում է երկրապահ ուխտագնացների երթը Արցախ աշխարհում

Արդեն մի քանի օր է ինչ սկսվել է Երկրապահ Կամավորականների Միության  ավանդական ուխտագնացությունը: Այն այս տարի ևս նվիրվում է Արցախի Հանրապետության անկախության օրվան և արցախյան ազատագրական պայքարում  զոհված հերոսների հիշատակին:

Ավանդական դարձած ուխտագնացությունն իր պատմությունն ունի:

Արցախյան ազատամարտի առաջին իսկ օրերից երկրապահ կամավորականների  սուրբ պարտքն էր`  մարտադաշտում ընկած իրենց ընկերների աճյունները արցախյան հողում ամփոփելուց հետո, ի նշան նրանց հիշատակի հավերժացման,  հուշարձան-խաչքարեր կանգնեցնել նրանց զոհված վայրերում. «Պետք է տեր կանգնել մեր զոհված ընկերների շիրիմներին, նրանց հիշատակը անմոռաց պահել». սա Էջմիածինի երկրապահ կամավորական ջոկատի հրամանատար Մանվել Գրիգորյանի հրահանգն էր:

Իսկ 1993-ից, երբ պատերազմը դեռ չէր ավարտվել, գեներալ-լեյտենանտ Մանվել Գրիգորյանի մայրը` Նազիկ Գրիգորյանը, հայրենասիրական մի նախաձեռնության սկիզբ է դնում. կազմակերպում է  զոհված ազատամարտիկների ծնողների այցելություն Արցախի հողում ամփոփված իրենց որդիների շիրիմներին` խաչքար-հուշարձաններին:

Իսկ երբ գեներալ-լեյտենանտ Մանվել Գրիգորյանն ընտրվեց ԵԿՄ  վարչության նախագահ, նախաձեռնեց` ամեն տարի այցի գնալ ազատագրված տարածքներում հանչող նվիրյալների շիրիմներին:

Եվ այսօր այլևս ավանդական դարձած ուխտագնացությունը, որ վերածվել է երկրապահական առաքելության, միայն նահատակների շիրիմներին այցելություն չէ, քանզի այսօրվա երկրապահի համոզմունքն է` Արցախ աշխարհի խաղաղությունը պաշտպանված կլինի միայն այն դեպքում, եթե ամուր պահենք արյամբ ազատագրված հողերը, իսկ հողն ամուր է իր ժողովրդով… Ազատագրված հայրենիքի գինը գիտակցող երկրապահ կամավորականներն այսօր իրենց ուժերի ներածին չափով փորձում են լուծել ազատագրված տարածքների վերաբնակեցման կարևորագույն խնդիրը, նաև նյութապես նեցուկ լինելով այդ հողերում ապրող մեր հայրենակիցներին` ազատագրված հայրենիքը շենացնողներին:

«Այս իմաստով ուխտագնացությունը դարձել է Երկարապահ Կամավորականների Միության գործունեության ծրագրային դրույթներից մեկը»,-մեզ հետ զրույցում ասում է ԵԿՄ վարչության անդամ, լրատվության պատասխանատու Հակոբ Հակոբյանը: «ԵԿՄ վարչության նախագահ, Արցախի հերոս, գեներալ-լեյտենանտ Մանվել Գրիգորյանը  հոգում է սահմանամերձ գյուղերի անապահով բնակչության խնդիրրները, տրամադրում  դրամական օժանդակություն, ուխտագնացության երթուղու մեջ ընդգրկված շուրջ 6 տասնյակ գյուղերի առաջին դասարանցիներին ապահովում դպրոցական պայուսակներով, անհրաժեշտ պիտույքներով: Պարոն Գրիգորյանը նաև տեխնիկայով ու գույքով փորձում է աջակցել Արցախի դպրոցներին, մշակույթի տներին, բուժհաստատություններին: Երկրապահ ուխտագնացների նպատակն է` ամուր պահել այդ տարածքներում բնակվող մեր ժողովրդի ռազմահայրենասիրական ոգին, իրենց պապենական օջախներում ապրելու նրանց  հավատը: Ուխտագնացությունը նվիրվում է նաև մեր հերոս մայրերին, որոնք պատերազմի տարիներին եղել են իրենց զավակների կողքին, ոգևորել նրանց: Այս իմաստով,   ուխտագնացությունը դարձել է ազգապահպանման, հայրենապաշտպանության, սերունդ դաստիարակելու կարևոր գործոններից մեկը: Ուխտագնացությամբ ևս մեկ անգամ հաստատվում է Հայաստան-Արցախ կապը: Այն ոգևորում է սահմանամերձ տարածքների բնակիչներին, ովքեր կառչած մնալով իրենց պապենական օջախներին, ամուր են պահում հայոց սահմանները:»,-ամփոփում է Հակոբ Հակոբյանը:

Օգոստոսի 19-ից երկրապահ ուխտագնացներն արդեն ճանապարհ են ընկել դեպի Արցախ աշխարհ: Նրանց են միացել երաժշտական բազմաթիվ համույթները, անհատ կատարողեր, որոնք այսօր համերգներով հադես են գալիս Արցախի Հանրապետության տարբեր մարզերում, զորամասերում, սահմանամերձ  գյուղերում: ԵԿՄ ուխտագնացությանը մասնակցում են ոչ միայն  արցախյան պատերազմի մասնակիրցներ, պատերազմում զոհված ազատամարտիկների հարազատներ, այլև մտավորականներ, մշակութի գործիչներ, հայրենական պատերզամի վետերնաններ:

Երկրապահ Կամավորականների Միության նախաձեռնությունն ընդգրկուն աշխարհագրություն ունի.  Այն սկսվում է  Հայաստանի Հանրապետության  մարզերից, սահամանամերձ բանակավայրերից ու ձգվում դեպի Արցախ աշխարհ:

Իսկ Արցախի Հանրապետության տարածքում ուխտագնացների ճանապարհն անցնում է լեգենդար 5-րդ բրիգադի մարտական ուղիով, ձգվում  երկրի հարավից հյուսիս` ողջ սահմանագծով. Հադրութի շրջանի Տողաձորի գյուղերով, Ասկերանի շրջանով դեպի Մարտունի, Մարտակերտ ու շրջակա գյուղեր, մինչև Թալիշ ու մայրաքաղաք Ստեփանակերտ, ապա ուխտագնացների շարասյունը բարձրանում է դեպի Շուշի ու Դերձոր:

Ինչպես տեղեկացնում է Հակոբ Հակոբյանը,  երաժշտական համույթները նախ համերգային ծրագրով հանդես են  եկել Գորիս քաղաքում տեղակայված զորամասի զինվորների ու զինծառայողների առաջ, որից հետո, երեկոյան տեղավորվել Դիզակ աշխարհի Տողաձորում` իրենց իսկ հիմնած վրանային ճամբարում:

Երկրապահներն համոզված են, որ  ուխտագնացությունը ոչ միայն  խոնարհում է արցախյան ազատագրական պայքարի հազարավոր զոհերի հիշատակի առաջ, այլև զգոնության կոչ` ուղղված   աշխարհին, որ հայն իր արյամբ հետ բերած հայրենիքը երբեք չի կարող զիջել թշնամուն: Ավելին, երկրապահը համոզված է, որ դեռ անելիք ունենք` հայրենիքի ազատագրման սուրբ գործը` հանուն որի ինը հազար երեք հարյուրից ավելի հայորդիներ զոհեցին իրենց կյանքը, երբե’ք կիսատ չի մնա…

ArmAr.am