Հայաստան այցելած թուրք փորձագետ, Բոսֆորի համալսարանի դասախոս Բեհլուլ Օզքանը, խոսելով Հայաստանի «Կենտրոն» հեռուստաընկերության եթերից, ասել է, թե Ադրբեջանի նախագահ Իլհամ Ալիևի ռազմատենչ հայտարարություններն ու պատերազմի սպառնալիքներն ընդամենը բլեֆ են: «Ես համոզված եմ, որ Իլհամ Ալիևը իրականում չի ցանկանում լուծել Ղարաբաղի հարցը, առավել ևս` պատերազմի միջոցով: Այսօրվա իրավիճակը` ստատու-քվոն, Ալիևին շատ ձեռնտու է: Նա նստած է միլիարդավոր դոլարների նավթի վրա, և այդ նավթամուղերը կառուցվել են, որովհետև նա երաշխիքներ է տվել շատ մեծ նավթային ընկերություններին, որ պատերազմ չի լինելու: Բոլորը գիտեն, որ այդ նավթամուղն այսօր անցնում է Հայաստանից ընդամենը 30-40 կմ հեռավորության վրա, և եթե հանկարծ պատերազմ սկսվի, Հայաստանը կարող է ռմբակոծել այն: Ալիևը պատերազմ սկսելու ռիսկ չունի, նա պարզապես իր հասարակության հետ է խաղում »,- հայտարարել է Բեհլուլ Օզքանը:

Թուրք փորձագետը  Ադրբեջանին համարել է ոչ ժողովրդավարական պետություն. «Ոչ ժողովրդավարական երկրներում ժողովրդին ղեկավարելու ամենալավ մեթոդը կորուսյալ հողերի վերադարձի մասին ամեն տարի խոստումներ տալն է»:

Փորձագետը  խոսել է նաև հայ-թուրքական սահմանի բացման, ու, ընդհանրապես, հայ-թուրքական հարաբերությունների մասին, և` հայերի ու թուրքերի չստցված համագործակցության մեջ դարձյալ մեղադրել է ադրբեջանցիներին: «Թուրքիայում շատ ուժեղ ադրբեջանական լոբբի կա, որովհետև շատ մեծ նավթային և քիմիական ընկերություններ կան. կառավարության վրա շատ մեծ ճնշում են գործադրում: Ադրբեջանի նման հիսթերիայի համատեքստում Թուրքիան չի կարող բացել իր սահմանները»:

ArmAr.am