Սեպտեմբերի 13-ին Մոսկվայում բացվել է Առողջապահության համաշխարհային կազմակերպության եվրոպական տարածաշրջանային 60-րդ նիստը, որը վարում էր Ռուսաստանի Դաշնության առողջապահության եւ սոցիալական զարգացման նախարար Տատյանա Գոլիկովան: Բացման խոսքով հանդես է եկել Առողջապահության միջազգային կազմակերպության գլխավոր նախագահ Մարգարետ Չանը:

Նիստին ողջույնի խոսքով ելույթ է ունեցել ՌԴ վարչապետ Վլադիմիր Պուտինը: Առողջապահության համաշխարհային կազմակերպության եվրոպական տարածաշրջանային 60-րդ նիստի աշխատանքներին մասնակցում էր նաեւ ՀՀ պատվիրակությունը` առողջապահության նախարար Հարություն Քուշկյանի գլխավորությամբ:

Նույն օրը նախարար Քուշկյանը հանդիպում է ունեցել ՌԴ առողջապահության եւ սոցիալական զարգացման նախարար Տատյանա Գոլիկովայի հետ: Հանդիպման ընթացքում քննարկվել են երկուստեք հետաքրքրություն ներկայացնող հարցեր:

Ստորագրվել է ՌԴ առողջապահության եւ սոցիալական զարգացման նախարարության եւ ՀՀ առողջապահության նախարարության միջեւ փոխըմբռնման Հուշագիր: Հուշագրի ստորագրմանը ներկա էր նաեւ ՌԴ-ում ՀՀ դեսպան Օլեգ Եսայանը:

Հարություն Քուշկյանը հանդիպում է ունեցել նաեւ անվանի բժիշկ, մանկաբույժ Լեոնիդ Ռոշալի հետ, այցելել մանկական անհետաձգելի վիրաբուժության եւ վնասվածքաբանության ինստիտուտի տարբեր բաժանմունքներ, ծանոթացել աշխատանքին: