Օրերս թուրքական NTV հեռուստաալիքի լրագրողները Հայաստանից մեկնել էին Լեռնային Ղարաբաղի Հանրապետություն և հարցազրույց վարել ԼՂՀ ԱԳ նախարար Գեորգի Պետրոսյանի հետ:

Պարզվում է, թուրք լրագրողների`   Լեռնային Ղարաբաղ կատարած այցը Ադրբեջանում լուրջ հակազդեցություն է առաջացրել: Նախ, Ադրբեջանի մեջլիսի նախագահ Զիյաֆետ Ազքերովը, թուրքական մամուլին խիստ   անհանգստացած կոչ է արել հարգել Ադրբեջանի   ինքնիշխան պետության տարածքային ամբողջականությունը:

Ազքերովը նաև հիշեցրել է թուրքերի ու ադրբեջանցիների եղբայրական կապերի մասին ու նկատել, թե Թուրքիան իրենց մշտապես աջակցել է, ավելին` Ղարաբաղն ու նրա շրջակա գյուղերը ընդունել է որպես ադրբեջանական հողեր: Ազքերովը  խնդրել է  թուրք եղբայրներին իրենց այլևս նման անհարմար իրավիճակի մեջ չգցել:

Սակայն գործը միայն մեջլիսի նախագահով չի ավարտվել:

Ադրբեջանի ԱԳ նախարարությունը ևս իր բողոքն է ներկայացրել Բաքվում Թուրքիայի դեսպանին և պարզաբանումներ պահանջել: Դեսպանատունը դեռ չի աձագանքել, փոխարենը, թուրքական մամուլը փորձում է մեղմել իրավիճակը. տպագրվում են հոդվածներ, որոնցում     վստահեցնում են,  թե ոչ ոք չի ցանկացել վիրավորել Ադրբեջանի արժանապատվությունը, ապա մեծ եղբոր իրավունքով խորհուրդ են տալիս այդչափ կասկածամիտ չլինել և մի փոքր վստահել իրենց:

Ք.Մ.

Թեգեր` Բաքվում Թուրքիայի դեսպան, Գեորգի Պետրոսյան, Զիյաֆետ Ազքերով, թուրք լրագրողների այցը ԼՂՀ