Հայ Առաքելական եկեղեցու Արցախի թեմի վերաբացման  20-րդ տարեդարձին նվիրված միջոցառումների շարքը մեկնարկեց սեպտեմբերի 26-ին` Գանձասարում: Այստեղ էր ժամանել Ամենայն հայոց կաթողիկոս Գարեգին Երկրորդը: Նրան դիմավորեցին Արցախի թեմի առաջնորդ Պարգև արքեպիսկոպոս Մարտիրոսյանը, ԼՂՀ պետական այրերը` Ազգային ժողովի նախագահ Աշոտ Ղուլյանի գլխավորությամբ, Հայ առաքելական եկեղեցու մի շարք թեմերի առաջնորդներ եւ ներկայացուցիչներ:

Գանձասարը պատահաբար չէր ընտրվել որպես Արցախի թեմի վերաբացմանը նվիրված միջոցառումների մեկնակետ: 20 տարի առաջ Վազգեն առաջին ամենայն հայոց կաթողիկոսի կոնդակով վերաբացվեց  Հայ առաքելական եկեղեցու` անցած դարի 30-ական թվականներին փակված  Արցախի թեմը:  1989 թվականի  հոկտեմբերի 1-ին Սուրբ Գանձասարի վանքի սուրբ Հովհաննես Մկրտիչ եկեղեցում`  Արցախի թեմի   առաջնորդ Պարգև արքեպիսկոպոս Մարտիրոսյանի կողմից  մատուցվեց վերաբացված թեմի առաջին պատարագը: Եվ 20 տարի անց կրկին այստեղ հավաքվելն արդեն իսկ անցած  տարիների յուրովի արժևորումն  էր:

«Արցախի թեմի վերաբացումը` այն էլ  Արցախյան շարժման ամենաթեժ պահին` չէր կարող պատահական  լինել»,- վստահ է ԼՂՀ Ազգային ժողովի նախագահ Աշոտ Ղուլյանը:

«Դա  խորհրդանշում էր  վերադարձ` մեր նախնյաց  արժեքներին»,-կարևորում է ԼՂՀ կրթության նախարար Վլադիկ Խաչատրյանը,- իսկ հոգևոր սննդի կարիք բոլորն ունեն`  ծեր թե մանուկ»:

Ամենայն հայոց կաթողիկոս  Գարեգին Երկրորդի հանդիսապետությամբ և Հայ առաքելական եկեղեցու հովիվների մասնակցությամբ Գանձասարի Սուրբ Հովհաննես Մկրտչի տաճարում կիրակնամուտի ժամերգություն կատարվեց:

Ժամերգությունից հետո   օրհնվեց որջ Արցախ աշխարհը, ապա հանդիսավոր թափորն ուղղվեց Գանձասարի մուտքի մոտ կանգնեցված խաչքարը: Արցախի թեմի վերաբացման քսանամյակին նվիրված խաչքարը ջրով և գինով լվացվելուց հետո`  օծվեց Գարեգին Երկրորդի ձեռամբ: Ապա Ամենայն հայոց կաթողիկոսը շնորհավորանքի խոսքով դիմեց ներկաներին: Հայրապետական խոսքը նաև Արցախի թեմի և հայության արցախյան հատվածի քսանամյա մաքառումի  յուրովի գնահատականն էր:

«Մենք գոհունակությամբ ենք մեր օրհնությունը Էջմիածնից բերում Արցախ: Հպարտ ենք, որ Արցախն ազատագրվեց համայն հայության ջանքերով»,- կարևորեց Ամենայն հայոց կաթողիկոսը: «Հաճախ զինվորին հավասար զենք էր կրում նաև հոգևորականը, քանզի ինչպես մեր սրբազան հայրերն են պատգամել` մենք պարտ ենք հանուն հայրենիքի փրկության մեր խաչը զենքով փոխարինել»:

Քսան տարի անց էլ Գանձասարում աղոթում են նույն ջեմեռանդությամբ: Աղոթում են սրտաբուխ, կորուստների արժեքի գիտակցումով ու հաղթանակի հավատով:

Իսկ սա վերահաստատում է, որ   Գանձասարում երբեք չի լռի զանգերի ղողանջը:

Նորայր ՀՈՎՍԵՓՅԱՆ
Ստեփանակերտ

Թեգեր` Ամենայն հայոց կաթողիկոս` Գարեգին Երկրորդ, Գանձասար, Պարգև արքեպիսկոպոս Մարտիրոսյան