Հոկտեմբերի 22-ին ՀՀ ԱԳ նախարարի տեղակալ Կարինե Ղազինյանն ընդունեց Եվրոպական խորհրդարանի պատգամավորներ ռումինացի Տրայան Ունգուրիանուին (Եվրոպական ժողովրդական կուսակցություն, Եվրոնեստ խորհրդարանական վեհաժողովի փոխնախագահ, Սեւծովյան տարածաշրջանի հարցերով զեկուցող), բուլղարացի Անդրեյ Կովաչեւին (Եվրոպական ժողովրդական կուսակցություն, Հայաստանի հարցերով համազեկուցող) եւ Ֆրանկ Էնգելին (Եվրոպական ժողովրդական կուսակցություն, Լյուքսեմբուրգում ՀՀ պատվո հյուպատոս):

Հանդիպման ընթացքում քննարկվեցին Հայաստան-ԵՄ հարաբերությունների օրակարգային հարցերը, մասնավորապես` ասոցացման համաձայնագրի շուրջ ընթացող բանակցությունները: Կողմերը կարեւորեցին խորհրդարանական կապերի զարգացումը, նշելով, որ Եվրոնեստ խորհրդարանական վեհաժողովի հիմնումը նոր խթան կլինի այդ գործակցության համար:

Կարինե Ղազինյանը ներկայացրեց արցախյան հակամարտության կարգավորման գործընթացի առանձնահատկությունները: Զրույցի ընթացքում կարեւորվեց տարածաշրջանային համագործակցության անհրաժեշտությունը:  Անդրադարձ կատարվեց նաեւ տարածաշրջանային այլ խնդիրների: