Նոյեմբերի 26–ին «ՄԻԺԻ» գրասենյակում տեղի ունեցավ «Սարդարապատ» շարժման նախաձեռնող խմբի կողմից ստեղծվելիք Ազգային Խորհրդարանի «Ազգային անվտանգության և պաշտպանության» հանձնաժողովի նիստ «ՀՀ Զինված ուժերում վերջերս տեղի ունեցած միջադեպերը» թեմայով։

Ստորև ներկայացնում ենք քննարկմանը ներկա, Արցախյան պատերազմի մասնակից, ՀՀ զինված ուժերի պահեստի սպա՝ կապիտան Ներսես Տեր-Պետրոսյանի խոսքը։

Նոր կազմավորվող ցանկացած զինված ուժ, բանակ որպես մոդել վերցնում է հաղթնակած բանակի կամ բանակների կառուցվածքը, բարոյական արժեհամակարգը, կառավարման սկզբունքները, կանոնագրքերը:

Եվ նոր կազմավորվող հայկական բանակը ընդօրինակեց ռուսական բանակի մոդելը:

Սակայն  հայերը դարերի ընթացքում ունեցել են բանակի կազմավորման հայկական մոդել, որի վերջին դրսևորումը եղավ Դավիթ Բեկի կողմից ստեղծած հայկական զինված ստորաբաժանումները: Այդ մոդելը հստակ աշխատել է և իրականացրել է երկրի պաշտպանությունը:

Դժվարանում եմ հստակ պատասխանել, թե այսօր այդ մոդելը որքանով է այժմեական և պատրաստ դիմագրավել առկա մարտահրավերներին և լուծել ցանկացած մարտական խնդիր: Սակայն այդ հարցը կարծես թե այժմեական է: Ցանկացած նոր մոդելի անցնելը ժամանակատար և ծախսատար աշխատանք է 20-25 տարվա կտրվածքով:

Իմ կարծիքով կգա այն ժամանակը, երբ պետությունը կփորձի անցնել նոր մոդելի կիրառմանը, որովհետև վերջին հաշվով մենք ունենք մի սահման, որը պետք է պաշտպանվի, ունենք սահմանափակ մարդկային ռեսուրս, որը պետք է այդ սահմանը պաշտպանի։

Այսինքն մեկ հայ զինվորը կանգնելու է տասի դեմ  և մենք պարտավոր ենք  բացահայտել հայ զինվորի, հայ մարդու ներքին ոգեղեն ուժերը, որի շնորհիվ հայ մարդը, պրոֆեսիոնալ զինվորականը, աշխարհազորը կկարողանան պաշտպանել հայրենիքը և հային աշխարհի ցանկացած մասում: