ՄԱԿ-Ը կարևորում է ժողովուրդների ինքնորոշման իրավունքը
Նյու Յորքում օրերս ՄԱԿ-ի Գլխավոր ասամբլեայում (ԳԱ) միաձայն ընդունվել են բանաձեւեր, որոնցում կարեւորվում է ժողովուրդների ինքնորոշման իրավունքը:
Մասնավորապես, Գլխավոր ասամբլեան ընդունելով «Ժողովուրդների ինքնորոշման համընդհանուր իրականցումը» խորագրով բանաձեւը, վերահաստատում եւ կոչ է անում հատուկ ուշադրություն դարձնել այս իրավունքի ոտնահարման դեպքերին: Կազմակերպության բազմաթիվ անդամ-երկրներ հավատացած են, որ ինքնորոշման իրավունքը միջազգային իրավունքի հիմնարար սկզբունքներից է, արդիական է այսօրվա միջազգային անցուդարձի համատեքստում եւ համարվում է միջազգային ողջ համակարգի կարեւորագույն հենասյուներից մեկը:
Հայաստանի արտգործնախարարության տեղեկացմամբ, Նյու Յորքում օրերս ընդունվել է մեկ այլ բանաձեւ, որն առնչվում է ՄԱԿ-ի եւ Իսլամական համաժողով կազմակերպության համագործակցությանը, որում ԳԱ-ն խնդրում է նշված երկու միջկառավարական կառույցներին շարունակել համագործակցությունը` ուղղված համընդհանուր խնդիրների լուծմանը, ինչպիսիք են միջազգային խաղաղության եւ անվտանգության, զինաթափման, մարդու իրավունքների եւ հիմնարար ազատությունների եւ ազգերի ինքնորոշման իրավունքի հիմնահարցերը:
Այսպիսով ՄԱԿ-ն իր հաստատակամությունն է հայտնել սեփական կանոնադրության ու գործունեության հիմնաքար հանդիսացող արժեքներին, եւ ոչինչ ավելին:
Ա. Հ.
ArmAr.am
Դիտել Hay-turq, Լրահոս, Քաղաքականություն բաժնի բոլոր նյութերը
