Ռ. Կորիւնի գրքի շնորհանդէսի առիթով

Նոր հայերէն գիրք էր լոյս տեսել և կազմակերպւել էր գրքի շնորհանդէսը Կալիֆորնիայի Հայ Գրողների Միութեան կողմից: Ինչ գեղեցիկ աւանդոյթ` մեծարել հեղինակին, այսինքն` փառաբանել հայ գիրն ու գրականութիւնը, փառաբանել նրա արարողին` Սբ. Մեսրոպ Մաշտոցին և նրանից շառաւիղւող ոսկեայ շղթան բիւր օղակներով:  Իւրաքանչիւր հայ գրքի հեղինակ օղակւում է այդ շղթային: Շղթան հազարագանձ մեզ առաջնորդում է դէպի յաւերժութիւն:

Շնորհանդէսը զուգադիպում էր նաև Վարդանանքին: Ազգային և կրօնական տօն:

Վարդանանք դարձան ոգեղէն աստղեր հայոց երկնքում էն վերից հսկելու, էն վերից արիութեան ոգի ներշնչելու քաջաց ընդդէմ թշնամաց:

Շնորհանդէսի երեկոյին Գլենդէլի հանրային գրադարանի դահլիճը լեցուն էր հանդիսականներով: Հանդէսի մեկնարկումը կատարեց ԿՀԳՄ նախագահ` բանաստեղծ Գրիշ Դաւթեանը: Նա մի շարք յայտարարութիւններից յետոյ տեղեկացրեց Հրանդ և Մանուշ Սիմոնեանների միջոցով միութեանս կատարւած  տարեկան նւիրատւութեան մասին, ապա ամբիոն հրաւիրեց  վիպասան Պօղոս Գիւպելեանին հանդիսավարելու երեկոն: Նա իր գրաւոր խօսքի մէջ ուրախութիւն յայտնելով շնորհանդէսի առիթով ասաց` «Այս երեկոյ Ռ. Կորիւնի` «Արևավառ իմ երկիր» հատորին շուրջը հաւաքւած ենք տօնական ոգիով…Արձակ գործը գրւած դասական ուղղագրութեամբ լարւած հետաքրքրութեամբ կը կարդացւի…»:

Ապա նա անդրադարձաւ միութեանս որդեգրած ուղեգծին նկատել տալով որ խտրականութիւն չի արւում գրքի շնորհանդէսի հարցում դիմողների նկատմամբ` «….Միութենէն ներս տիրող եղբայրական ոգին միայն վաստակաւորներուն չէ յատկացներ…»:

Բեմ հրաւիրւեց երիտասարդ մտաւորական, բանասէր և «Լոյս» գրքերի հեղինակ Յովսէփ Նալբանդեանը ողջոյնի խօսք ասելու: Նա  գնահատեց հեղինակին և նրա հրատարակած գրքերը ասելով` «…Ուրեմն`  սիրելի Ռուբէնին  պիտի ըսեմ, որ ան իր մեղեդին ունի, եթէ մեղեդի չունենար, չորս տարւայ մէջ երրորդ գիրքը հրատարակելու խիզախութիւնը չէր ունենար…»:  Նա նկատի առնելով հեղինակի անցեալի ծառայութիւնները և ներկայի գրական աշխատանքները ասաց.«…Որպէս երկար տարիներու ազգային-հասարակական գործիչ հրապարակագրական քո շունչովդ թէ’ քայլ կը պահես հասարակութեան հետ և միևնոյն ժամանակ մեր առօրեայ հոգսերը, ազգային խնդիրները հողորդակից կը դարձնես մեր ժողովրդին»: Այնուհետև նա ընթերցեց հեղինակի կենսագրութիւնը:

Գրքից  ընթերցում կատարեցին` Այլին  և Արևիկ Քէշիշեաններըը, նրանք իրենց արտայայտիչ ընթերցումներով գրքի ոգին արտայայտող պատառիկներ հրամցրեցին լսարանին արժանանալով գնահատանքի:

Մեր սիրելի մայեստրօ Հենրիկ Անասեանի ելոյթը, գոհունակութեամբ ընկալւեց, թէ մտքերով և թէ հետաքրքիր ազդեցիկ առոգանութեամբ, նա սրտցաւութեամբ և ուրախութեամբ գնահատեց ու քաջալերեց Ռ.Կորիւնին  շարունակելու և ստեղծագործելու գեղարւեստի ոգուն հաւատարիմ ձգտումով: Նրա ելոյթին միախառնւած էր նաև գրականագէտի ակնարկ արժևորում :

Ուղերձներ էին յղւել մեծարւողին` Իրան Քամարա Լիլիան հայ յանձնախմբի և ընկերների կողմից, որոնք ընթերցւեցին հանդիսավարի միջոցով: Միտք բանին գնահատանք էր գրքի հեղինակի անցեալի ծառայութեամբ կեանքի մասին և թէ «Արևավառ իմ երկիր» գրքի հրատարակութեան առիթով շնորհաւորանքներ:

Իւրաքանչիւր  հեղինակ ցանկանում է, որ իր գրքի մասին գրւի և խօսւի, մտքերի թարմութեան, մտածելակերպի, շարահիւսութեան, ուղղագրութեան, ոճի, ժանրի, անւան և շապիկի մասին ի միոյ բանիւ գրքի իրական պատկերը երևան գայ,  անաչառ և անկողմնակալ գնահատականներ լսի և կարդայ: Սրաթափանց և բանիմաց գրաքննադատի գործ է սա, պրիզմակով հայեցող, որ երևան բերի իրականն ու անիրականը,  հարազատն ու անհարազատը,  գեղեցիկն ու տգեղը, ազգայինն ու ապազգայինը, հայրենասիրութիւնն ու օտարամոլութիւնը, մարդասիրութիւնն ու ժողովրդասիրութիւնը, մէկ խօսքով գրքի էութիւնը ի յայտ բերելու անաչառ նախանձախնդրութեամբ:

Բանաստեղծ Գրիշ Դաւթեանն իր գրաւոր գրախօսականում անդրադարձաւ գրքի տարբեր գլուխների վերլուծութեան ներկայացնելով իր գնահատականը.  նա այսպէս է բնութագրում գիրքը. «Աշխարհաճանաչութեան իր պրպտումների մէջ Ռ. Կորիւնը աւելի դիտող ու ճանաչող է, մտածող, կշռադատող, ապա զգացող: Ինքնաճանաչման և ինքնահաստատման առհաւատչեան են կազմում նրա տրամաբանութիւնը և եզրահանգումները: Նա գրում է մտածումով, յիշողութեամբ…»: Մի այլ պարբերութեամբ նա գրում է` «Կեանքի ու աշխարհքի հանդէպ աշխարհայեցողութեամբ լաւատեսօրէն հաւատաւոր, ձգտում է լաւին ու բարուն… Գրականութիւնը նրա համար նւիրական գործ է, այդ սիրով է նա տոգորւած գրում իր էջերը

Բանաստեղծ և երգիծաբան Ներսէս Տէր Մեսրոպեանն իր խօսքն ուղղելով հեղինակին ասաց` «Իրանահայ միութեան գրադարան-ընթերցարանի ընկերների և Իրանահայ միութեան «Տեղեկատու» ամսաթերթի վարչութեան կողմից ջերմօրէն ողջունում եմ մեր սիրելի` Ռ. Կորիւնի երրորդ գրքի հրատարակչութիւնը, որը  իմ տեսակէտով մի կատարեալ յաղթանակ եղաւ իր համար: Գիրքը թէ’ ներքին բովանդակութեամբ և թէ’ արտաքին կազմւածքով  բացառիկ էր…»:

Հետաքրքիր երեկոյ, ներկաները մասնակցեցին գինեձօնին, բոսոր գինին հայկական կաթիլ-կաթիլ հեղւում էր նորալոյս գրքի էջերին ,   ողջ գիրքը թաթախւեց հայոց երկրի արևավառ խաղողի  բերքով, ինչպէս Սբ. Ծնունդի և Սբ. Զատկի թաթախման գիշերը իւրաքանչիւր հայ ընտանիքի սեղանին եկեղեցուց բերւած նշխարքը թաթախւում և լուծւում է գինու մէջ, որից մասունք սրբութեան  Յիսուսի արիւնն ու մարմինը խորհրդանշող բաժանւում է ընտանիքի անդամների մէջ որպէս ծումի կամ պասի լրման նշան, մեղքերի քաւութեան ու թողութեան Սբ. հաղորդութիւն:

Գինովացած գիրքը յիշատակ պահւեց:

Բացառիկ երեկոյ` մեծարանքի գեղեցիկ հանդիսութիւն:

Այլին Ք. Գլենդէլ, Լոս Անջելէս