ԵԱՀԿ դիտարկում-հետաքննությունը չի կայացել Ադրբեջանի պատճառով
Լեռնային Ղարաբաղի Հանրապետության իշխանությունների առաջարկով Լեռնային Ղարաբաղի և Ադրբեջանի զինված ուժերի շփման գծում մարտի 20-ին պլանավորված ԵԱՀԿ դիտարկում-հետաքննությունը Ասկերանի ուղղությամբ` Ակնա բնակավայրի մոտակայքում` կապված մարտի 17-ին տվյալ վայրում ադրբեջանական կողմից դիպուկահար կրակոցի արդյունքում ԼՂՀ պաշտպանության բանակի զինծառայող Ահարոն Հայրապետյանի մահվան հետ, չի կայացել Ադրբեջանի հրաժարվելու պատճառով: Տեղեկացնում է ԼՂՀ ԱԳ նախարարության լրատվական ծառայությունը:
ԵԱՀԿ գործող նախագահի անձնական ներկայացուցիչ դեսպան Անջեյ Կասպշիկի ղեկավարությամբ ԵԱՀԿ առաքելությունը ստիպված էր հետաքննությունն իրականացնել միակողմանիորեն: ԼՂՀ պաշտպանության բանակի ներկայացուցիչները դիտորդական խմբին տեղեկացրեցին կրակի դադարեցման ռեժիմի կոպիտ խախտման դեպքի մանրամասների մասին, որի արդյունքում ԼՂՀ պաշտպանության բանակի զինծառայող է զոհվել:
Մի քանի րոպե անց` ԵԱՀԿ առաքելության մեկնելուց հետո, այն վայրի ուղղությամբ, որտեղ հետաքննություն էր իրականացվում, դիպուկահար կրակոցներ են արձակվել ադրբեջանական կողմից: Դեսպան Անջեյ Կասպշիկին իրազեկ են դարձրել տվյալ միջադեպի մասին:
Դիտել Hay-turq, Ադրբեջան, Զինված ուժեր, ԼՂ Հանրապետություն, Լրահոս բաժնի բոլոր նյութերը
