Ապրիլի 20-ին սպասվում է «Հայոց Ցեղասպանությունը 1914-18 թվականների վրացական պարբերականներում» գրքի շնորհանդեսը Վրաստանի խորհրդարանի շենքում: Նրա ստեղծման գաղափարը, ինչպես նաև ժողովածուի հրատարակման հետ կապված բոլոր աշխատանքները իրականացրել են «Վրաստանի Հայ Համայնք» և «Վրաստանի Հայ ուսանողների միություն» հասարակական կազմակերպությունները: Գրքում զետեղվել են Վրաստանի Ազգային Խորհրդարանական գրադարանի` վրացական պարբերականների բաժնում պահպանվող Հայոց Ցեղասպանությանն առնչվող նյութերը: Այն ընդգրկում է 1914-1918 թթ.,այսինքն իրադարձությունները ներկայացվում են Առաջին աշխարհամարտին Թուրքիայի ներգրավվելուց դեռ մի քանի ամիս առաջվանից և հասնում մինչեւ 1918 թ. մայիս` Վրաստանի, Հայաստանի ու Ադրբեջանի անկախացումը: Ժողովածուում ժամանակագրական կարգով տեղ են գտել այն կարևորագույն տվյալները, որոնք վրացական պարբերականների շնորհիվ վերլուծական հոդվածների և փաստերի արձանագրման տեսքով հասել են մեր օրերը: Հրատարակության գլխավոր նպատակը վրաց ընթերցողին կոնկրետ թեմայի հետ կապված Խորհրդարանական արխիվում պահպանված նյութերին ծանոթացնելն է: