ՌԴ ԱԳ նախարար. «Մենք կարծում ենք, որ հասել ենք այն հանգրվանին, երբ հարկավոր է որոշում ընդունել»
«Շատ մոտ ապագայում ղարաբաղյան հակամարտության կարգավորման աշխատանքները կշարունակվեն»,- Հայաստանի ԱԳ նախարար Էդվարդ Նալբանդյանի հետ Մոսկավայում կայացած հանդիպումից հետո հայտարարել է Ռուսաստանի արտաքին քաղաքական գերատեսչության ղեկավար Սերգեյ Լավրովը:
«Մենք արձանագրեցինք, որ Կազանում նախագահները հայտարարեցին կարեւոր հարցերի համաձայնեցման մասին, որոնք նպաստում են կարգավորման վերջնական պայմանավորվածությունների ձեռքբերմանը»,- նշել է Ռուսաստանի արտգործնախարարը:
Լավրովի խոսքով՝ ՌԴ նախագահ Մեդվեդևը որպես միջնորդ, ով գործում է ԱՄՆ- ի և Ֆրանսիայի համաձայնությամբ և աջակցությամբ, ավարտել է իրավիճակի վերլուծությունը կազանյան հանդիպումից հետո և մոտ ժամանակներս հետագա քայլերի վերաբերյալ որոշում կընդունի:
«Մենք կարծում ենք, որ այժմ հասել ենք այն հանգրվանին, երբ հարկավոր է որոշում ընդունել»,- ընդգծել է նախարարը ու հավելել, որ Մինսկի խմբի ձևաչափի փոփոխությունն արդյունավետ չի լինի:
Համատեղ մամուլի ասուլիսի ժամանակ Հայաստանի ԱԳ նախարարն ընդգծել է, որ այսօր խելամիտ չէ փոխել Ղարաբաղյան հակամարտությամբ զբաղվող միջնորդների ձևաչափը: Նա Մինսկի խումբն անվանել է բավականին արդյունավետ աշխատող ձևաչափ, որը տարիների ընթացքում մեծ փորձ է կուտակել բանակցային գործընթացում: Նալբանդյանը նշել է, որ Հայաստանը բարձր է գնահատում ղարաբաղյան հակամարտության բացառապես խաղաղ կկարգավորմանն ուղղված Ռուսաստանի ջանքերը:
Ի դեպ՝ շուտով Մոսկվա կմեկնի Ադրբեջանի արտգործնախարար Էլմար Մամեդյարովը։ Իր ռուս պաշտոնակցի հետ հանդիպման ժամանակ ադրբեջանցի դիվանագետը քննարկելու է ղարաբաղյան հիմնախնդիրը, տեղեկացրել է Ռուսաստանում Ադրբեջանի դեսպան Փոլադ Բյուլբյուլօղլուն։
Ըստ որոշ լրատվամիջոցների՝ հուլիսի 8- ին կայանալու է նաեւ Ռուսաստանի արտգործնախարարի կարճատեւ այցը Բաքու, այնուհետեւ Երեւան։ Կրկին օրակարգային է լինելու ղարաբաղյան խնդիրը: Պաշտոնական աղբյուրները Սերգեյ Լավրովի այցի մասին տեղեկություն չեն տարածել:
Դիտել TOP, Ադրբեջան, ԼՂ Հանրապետություն, Լրահոս, Ռուսաստան, Տարածաշրջան, Քաղաքականություն բաժնի բոլոր նյութերը
