Սկսվեց վոլեյբոլի Արցախի գավաթի խաղարկությունը
Արցախի Հանրապետության Նախագահ Բակո Սահակյանը հուլիսի 14-ին ուղերձ է հղել Ստեփանակերտում մեկնարկած Վոլեյբոլի Արցախի գավաթի խաղարկության մասնակիցներին:
Վոլեյբոլի Արցախի գավաթի խաղարկության հարգարժան մասնակիցներ,
Ի սրտե ողջունում եմ ձեզ եւ շնորհավորում վոլեյբոլի Արցախի գավաթի անդրանիկ խաղարկության մեկնարկի կապակցությամբ:
Այս մարզական միջոցառումը կարեւոր նշանակություն ունի մեր ողջ հանրապետության համար, քանի որ սպորտը հանդիսանում է մատաղ սերնդի դաստիարակության եւ ազգի գենաֆոնդի պահպանման լավագույն միջոցներից մեկը: Այդ իսկ պատճառով սպորտի եւ ֆիզիկական կուլտուրայի զարգացմանը առանձնակի կարեւորություն է հատկացվում մեր հանրապետությունում, ու այստեղ հատուկ նշանակություն ունի պաշտպանության բանակի հետ սերտ համագործակցությունը: Եվ պատահական չէ, որ վոլեյբոլի ֆեդերացիան մեզ մոտ ղեկավարում է պաշտպանության փոխնախարարը:
Հարգելի մարզիկներ,
Հուսով եմ, որ դուք գեղեցիկ խաղ կպարգեւեք բոլորին: Ուզում եմ ընդգծել, որ նման մրցումները նպաստում են մարդկանց ֆիզիկական եւ մտավոր կարողությունների զարգացմանը, հայ ժողովրդի տարբեր հատվածների միասնականության եւ համախմբվածության ամրապնդմանը: Իսկ նման դեպքում պարտվողներ չեն լինում:
Բոլորիդ մաղթում եմ հաջողություններ եւ ամենայն բարիք:
Դիտել ԼՂ Հանրապետություն, Լրահոս, Հասարակություն բաժնի բոլոր նյութերը
