Վաշինգտոնի Հայ դատի գրասենյակն իր հաղորդագրությունում հայտնում է, թեԱՄՆ Սենատի արտաքին հարաբերությունների հանձնաժողովում կայացած լսումների ժամանակ հայամետ սենատոր Ռոբերտ Մենենդեսը Թուրքիայում ԱՄՆ-ի դեսպան Ֆրենսիս Ռիչարդոնեին մի շարք հարցեր է ուղղել ԱՄՆ-ի կողմից Հայոց ցեղասպանության ճանաչման խնդրի շուրջ:

Ամերիկայի հայկական համագումարի հաղորդագրության համաձայն, Նյու Ջերսին ներկայացնող դեմոկրատ սենատորի հարցին ի պատասխան` արդյոք Միացյալ  Նահանգները երբեւէ հերքե՞լ է Հայոց ցեղասպանությունը, Ռիչարդոնեն իր համաձայնությունն է հայտնել Միացյալ Նահանգների նախագահ Բարաք Օբամայի կողմից տրված Մեծ Եղեռն (Meds Yeghern) որակմանը:

Չնայած դրան, դիվանագետը չի կարողացել ճիշտ արտաբերել այդ բառերը` Meds Yeghern-ի փոխարեն ասելով Yeds Meghern:

Մենենդեսը հարցրել է նաեւ` արդյո՞ք, Ռիչարդոնեն անհամաձայնություն ունի Հայոց ցեղասպանության հարցում Բարաք Օբամայի, ինչպես նաեւ ԱՄՆ-ի փոխնախագահ Ջոզեֆ Բայդենի եւ պետքարտուղար Հիլարի Քլինթոնի` որպես սենատորներ պաշտոնավարման շրջանում արտահայտած դիրքորոշման հետ, երբ,  նրանք անցյալ դարասկզբին Օսմանյան կայսրությունում տեղի ունեցածը որակում էին Հայոց ցեղասպանություն եւ քանիցս հանդես են եկել Հայոց ցեղասպանությունը ճանաչող օրինագծերի ընդունման օգտին:

Ռիչարդոնեն արձագանքել է, թե անհամաձայնություն չունի իր վերադասների հետ:

Վաշինգտոնի Հայ դատի գրասենյակը խուսափողական է որակել հայամետ սենատորի հարցերին դիվանագետի տված պատասխանները:

Լսումների ժամանակ Ֆրենսիս Ռիչարդոնեին այլ սենատորների կողմից հարցեր են ուղղվել նաեւ Թուրքիայում կրոնական ազատությունների, հայկական, հրեական, ասորական եւ մյուս փոքրամասնությունների վերաբերյալ:

Դեսպանին կուղղվեն նաեւ գրավոր հարցեր, որոնց պատասխանների ամփոփումից հետո միայն հանձնաժողովը որոշում կկայացնի նրա հաստատման վերաբերյալ: Ամերիկայի հայկական համագումարի փոխանցմամբ, այն տեղի կունենա սեպտեմբերին:

Սենատի արտաքին հարաբերությունների հանձնաժողովը անցած տարվա օգոստոսի 3-ին Ռիչարդոնեի  թեկնածությանը հավանություն տվել էր, եւ հարցը տեղափոխվել էր լիագումար նիստ: Սակայն հանրապետական  սենատոր Սեմ Բրաունբեքը առկախել էր քվեարկությունը` ԱՄՆ-ի վարչակազմին կոչ անելով «վերանայել այս թեկնածությունը»: Նախագահ Օբաման, այնուհանդերձ, անցած տարվա դեկտեմբերի վերջին օգտվելով Սահմանադրությամբ իրեն վերապահված իրավունքից եւ այն հանգամանքից, որ Սենատը արձակուրդում էր, Ֆրենսիս Ռիչարդոնեին նշանակել է Թուրքիայում ԱՄՆ-ի դեսպանի պաշտոնում:

Քանի որ, ըստ ամերիկյան օրենսդրության, Սենատի շրջանցմամբ նախագահի նշանակած դեսպանները հնարավորություն ունեն աշխատելու մոտավորապես մեկ տարի, եւ այդ ընթացքում դիվանագետների թեկնածությունները պետք է արժանանան Սենատի հավանությանը, հակառակ դեպքում՝ նրանց լիազորությունները դադարեցվում են, Ֆրենսիս Ռիչարդոնեի թեկնածությունը նորից է քննարկվում:

ArmAr.am