Օգոստոսի 19-ի, ժամը 16-ին, Թբիլիսիի Հավլաբարի Սուրբ Էջմիածին եկեղեցի են մտնում երկու` ազգությամբ վրացի երիտասարդներ: Տարածված տեղեկատվության համաձայն, վրացիները եղել են ոչ սթափ վիճակում: Օգտվելով հոգեւոր հայրերի բացակայությունից, նրանք անբարո և  ագրեսիվ պահվածք են դրսևորել. նրանցից մեկը մոտեցել է խորանի մոտ դրված Սուրբ Գրքին, սկսել կոպիտ շարժումներով թերթել գիրքը, որի հետեւանքով  պոկվել են գրքի էջերը:

Իրենց խուլիգանական արաքով  չբավարարված, վրացիներից մեկը բազմել է եպիսկոպոսական գահին: Եկեղեցում գտնվող կանայք փորձել են կարգի հրավիրել սանձարձակ երիտասարդներին եւ դուրս բերել եկեղեցուց: Հեռանալիս նրանք պոկել են եկեղեցու դռներին փակցված հայտարարություններն ու ցինիկաբար այրել:

Հայ Առաքելական եկեղեցու վիրահայոց թեմի առաջնորդ Վազգեն եպիսկոպոս Միրզախանյանը տեղեկացրել է, որ իրենք դիմել են ոստիկանության:  Առաջնորդարանը պատրաստվում է դիմել Վրաստանի ներքին գործերի նախարարություն եւ պետական այլ կառույցների, ինչպես նաեւ բողոքի նոտա ուղղել Վրաց ուղղափառ եկեղեցուն:

Վազգեն եպիսկոպոսի համոզմամբ` վրաց երիտասարդների այս արարքը հետեւանք է հուլիսի 5-ին Վրաստանի օրենսդրության մեջ կատարված փոփոխության, ինչը նախատեսում է իրավական կարգավիճակ տալ երկրի կրոնական փոքրամասնություններին: Դրանից հետո սկիզբ առավ հակահայկական շարժում, որը մինչ օրս չի դադարում:

Վրացական մամուլը եւ հեռուստաալիքները, այսպես ասած, առանձնահատուկ տեղ են հատկացնում հայկական թեմաներով հոդվածներին եւ հաղորդումներին: Վիրահայոց հոգեւոր առաջնորդի խոսքով` սա հետևանքն է վրաց ուղղափառ եկեղեցու որոշ հոգեւորականների ծայրահեղ եւ ազգայնամոլ քարոզչության:

Հիշեցնենք, երկու ամիս առաջ Թբիլիսիի հայկական Սուրբ Էջմիածին եկեղեցին վերաօծել էր Գարեգին Բ-ի՝ Վրաստան կատարած հովվապետական այցի ժամանակ։

ArmAr.am

Թեգեր` Թբիլիսիի Հավլաբարի Սուրբ Էջմիածին եկեղեցի