Դեկտեմբերի 10-ին Ֆրանսիայի մայրաքաղաք Փարիզի Սեվր արվարձանում կայացավ Արևմտահայերի 3-րդ համագումարը, որը հիմնադրեց «Արևմտահայերի ազգային համագումար»միջազգային հասարակական, ոչ կառավարական, ոչ շահութաբեր կազմակերպությունը: Համագումարին մասնակցեցին ԱՄՆ-ից, Կանադայից, Ֆրանսիայից, Ավստրիայից, Արգենտինայից, Ռուսաստանից, Հայաստանից և այլ երկրներից ժամանած բազմաթիվ հայ պատվիրակներ:

Համագումարի մասնակիցների կողմից տարածված հայտարարության համաձայն,  կազմակերպության նախագահ է ընտրվել միջազգային իրավունքի մասնագետ Սուրեն Սերայտարյանը,  փոխնախագահներ` գեներալ Նորատ Տեր-Գրիգորյանցը, հրապարակախոս Կարեն Միքայելյանը և հասարակական գործիչ Սոնա Յագուպյանը: Կազմակերպությունն ընդունել է իր կանոնադրությունը, ընտրել գործադիր մարմին` «Արևմտահայերի Ազգային Խորհուրդը», կազմված 24 անդամներից,  և հաստատել կազմակերպության 2012-2013թ.թ. գործունեության ծրագիրը:

Ինչպես նշվում է հայտարարության մեջ, «Արևմտահայերի Ազգային Համագումարի» առաջնահերթ նպատակն է մշակել և իրագործել այնպիսի ծրագրեր, որոնք հնարավորություն կընձեռեն պաշտպանել արևմտահայերի շահերն ու իրավունքները, որոնք ոտնահարվեցին 1915 – 1923 թթ ցեղասպանության ժամանակ եւ մնում  են այդպիսին մինչեւ այսօր»:

Համագումարի մասնակիցները համոզված են, որ ներկայումս, երբ սառը պատերազմն ավարտված է, երբ ձևավորվում է նոր  համաշխարհային համակարգ, երբ վերականգնված է հայոց պետականության անկախությունն ու ազատագրված է Արցախը, հայ ժողովրդը հնարավորություններ ունի նորովի  պայքարելու ընդհատված Հայոց հարցի լուծման համար:

«Արևմտահայերի ազգային համագումար» կազմակերպությունը ծրագրում է`  համագործակցել այն հասարակական,  գիտահետազոտական ու համալսարանական  հաստատությունների հետ, որոնք զբաղված են Հայոց Ցեղասպանության փաստի ուսումնասիրությամբ:  Ակտիվ գործունեություն ծավալել հայ քաղաքակրթական,  մշակութային, ճարտարապետական արժեքների պաշտպանության ու վերականգնման ուղղությամբ:

Կազմակերպության գլխավոր նպատակներից  է հետևողական աշխատանք տանել  հայտնաբերելու և  հաշվարկելու այն անհատական ո հավաքական վնասները, որ կրել է հայ ժողովուրդը 1915 թվականից սկսյալ: Ապա միջազգային իրավագետների ակտիվ ներգրավմամբ ազգային, տարածաշրջանային, միջազգային դատարաններ դատական հայցեր ներկայացնել` կրած ամբողջական վնասների հատուցումը ապահովելու նպատակով:

Համագումարի մասնակիցները ընդգծում են, որր Հայկական հարցի լուծման արդյունավետությունը մեծապես պայմանավորված է ՀՀ իշխանությունների հետ ակտիվ  համագործակցությամբ` ի նպաստ այնպիսի համահայկական մեծածավալ ծրագրերի մշակման ու իրագործման,  որոնք կերաշխավորեն համայն հայության հեռանկարային ապահով զարգացումն ու հզորացումը:

ArmAr.am