Արեւմուտքը շահագրգռված է, որպեսզի Ադրբեջանում պահպանվի կայունությունը, քանի որ վերջինս արեւմտյան երկրներին էներգակիրներ է մատակարարում: Այս մասին հունիսի 13-ին կայացած մամուլի ասուլիսի ժամանակ հայտարարել է ադրբեջանագետ Սարգիս Ասատրյանը` անդրադառնալով այն հարցին, արդյոք թուրքական բողոքի ակցիաները կկրկնվեն Ադրբեջանում:

Նրա համոզմամբ, յուրաքանչյուր երկրում, եթե փոքրիկ բողոքի ակցիան վերածվում է զանգվածային բողոքական շարժման, ապա դրան անպատճառ նպաստում են բազմաթիվ գործոններ: «Ամեն դեպքում, պետք է սպասել հետագա զարգացումներին` կապված Ստամբուլում «Ալիեւ, հեռացիր, հաջորդը դու ես» կարգախոսների հետ: Կարծում եմ` դրանց հեղինակները կարող են լինել այն ադրբեջանցիները, ովքեր սեփական երկրում զրկված են խոսքի ազատության իրավունքից»,-ընդգծել է Ասատրյանը:

Նա նաեւ հավելել է, որ Թուրքիայում վերջին զանգվածային ցույցերից հետո, Բաքվում լուրջ մտավախություններ ունեն, որ նմանատիպ իրադարձություններ կարող են կրկնվել նաեւ Ադրբեջանում: «Բացի այդ, չի կարելի բացառել, որ սուննիական իսլամիստական խմբավորումները, որոնք գործում են երկրի հյուսիսում եւ իրանամետ շիական խմբավորումները կարող են Ադրբեջանում լուրջ ապակայունացնող դեր խաղալ»,-եզրափակել է Սարգիս Ասատրյանը: