Հունվարի 11-ի լույս 12-ի գիշերը Գյումրիի Մյասնիկյան 188 տանը տեղի ունեցած դաժան սպանության գործով հիմնական կասկածյալ Վալերի Պավելի Պերմյակովը ձերբակալվել է: Ռուս սահմանապահներին հաջողվել է հայտնաբերել նրան Բայանդուր և Երազգավորս գյուղերի մոտակայքում, որոնք հայ-թուրքական սահմանին մոտ գտնվող գյուղեր են։ Ենթադրվում է, որ ռուս զինվորը Արփաչայ գետի կողմից ցանկացել է կտրել սահմանային փշալարերն ու անցնել Թուրքիա։

Այս պահին նա գտնվում է ռուս սահմանապահների մոտ:

Հիշեցնենք, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների 7 հոգանոց ընտանիքի 6 անդամներին։ Սպանվածներից հինգը չափահաս են եղել, մեկը՝ մանկահասակ երեխա: Վեց ամսական մյուս երեխան տեղափոխվել է հիվանդանոց, որտեղ վիրահատվել է եւ այժմ ծանր վիճակում գտնվում է վերակենդանացման բաժանմունքում։ Սպանության հիմնական կասկածյալը ռուս զինվորական Վալերի Պավելի Պերմյակովն է: Փաստի առթիվ հարուցվել է քրեական գործ, նշանակվել են դատաբժշկական, դատաձգաբանական փորձաքննություններ: