Ռուսական մի շարք կայքեր անդրադարձել են երեկ Վալերի Պերմյակովի տված խոստովանական ցուցմունքներին: Մի շարք լրատվական աղբյուրներում կան լրացուցիչ տեղեկություններ, որոնք վերաբերում են անմարդկային սպանության դրդապատճառներին:

Մասնավորապես՝ «Lifenews» ու «newsru.com» կայքերը գրում են, Պերմյակովը պատմել է, թե դուրս է եկել զորամասից, քանի որ չի ցանկացել ծառայել, ուզել է փախչել ու անցնել Թուրքիայի սահմանը, որպեսզի իրեն չգտնեն ու ետ չվերադարձնեն: Մինչ Հայաստան տեղափոխվելն էլ Պերմյակովը ՌԴ-ում ծառայելիս մի անգամ փախել է զորամասից:

Զենքը ձեռքին դուրս գալով զորամասից` ինչ-որ պահի Պերմյակովը ցանկացել է ջուր խմել ու գիշերով մտել է Ավետիսյանների տուն: Երբ նրան նկատել են, Պերմյակովը վախեցել է, որ իրեն կհանձնեն զորամասի ղեկավարությանը, իսկ ինքը չէր պատրաստվում դատվել դասալքության համար: Հենց այդ պատճառով էլ իբր նա սպանել է Ավետիսյանների տան բոլոր անդամներին, փոխել շորերն ու փախել: Իսկ լացող փոքրիկ երեխայի ձայն էլ կտրելու համար դանակ է գործածել, քանի որ զենքի հետ խնդիր է առաջացել: